潮勝打冷小廚：屯門麻甩必食宵夜鑊氣小菜

喺屯門真係幾夜都唔怕肚餓！除咗龍門居宵夜街夜市之外，想坐低飲吓啤酒，成班friend一齊食打冷小菜都係唔錯嘅選擇。位於屯門嘅仁愛堂一帶，絕對稱得上係屯門嘅第一代宵夜夜浦點，其中潮勝打冷小廚嘅出品高質有鑊氣，啱晒成班麻甩朋友去深宵聚餐啦！

潮勝打冷小廚

椒鹽嘅小菜真係去大排檔必食！心大心細想食九肚魚又想食鮮魷？潮勝打冷小廚嘅椒鹽三色就有齊雞軟骨、九肚魚同鮮魷，滿足喜歡香口人士嘅慾望。九肚魚炸到外脆內軟，無骨啖啖肉；魷魚新鮮爽口，口感彈牙；至於雞軟骨爽脆，充滿咬口。而每一款都椒鹽味都十足，送酒一流。

越邪惡越喜愛嘅脆皮炸大腸，炸到外皮脆卜卜，潮勝打冷小廚嘅大腸清潔得非常乾淨冇異味。點上甜酸醬後，味道更上一層樓，而且油香十足，配埋冰涼嘅啤酒，令人食唔停口。

薑蔥霸王雞用上新鮮雞件，半隻嘅份量都唔少。而且雞件唔算太肥，但肉質又唔會嚡颯颯，肉嫩多汁，加上薑蔥嘅點綴，令到雞香味突出！而潮勝打冷小廚秘製嘅豉油醬汁，更加有畫龍點睛嘅作用，夠晒惹味。

餐廳名稱：潮勝打冷小廚
地址：屯門仁愛堂街14號蘭苑地舖

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！