簡聚：儀式感滿瀉的西餐廳

每日返工放工，坐車行返屋企同一條路，食嘅餐廳都係差唔多，生活唔應該剩係得習慣，有時都應該為平凡嘅日子製造一啲不平凡，增加生活嘅儀式感。位於元朗嘅簡聚，係區內少見嘅西餐廳，由空運生蠔到精緻西餐，加上簡聚精緻嘅裝潢同寫意嘅氛圍，令人瞬間放鬆同投入生活。

簡聚

簡聚嘅生蠔嚟自法國同愛爾蘭，其中法國嘅生蠔又名水中花，微鹹嘅海水味，口感清新，蠔肉鮮甜味，正好用嚟喚醒味蕾；而嚟自愛爾蘭嘅聖爾庭，海水味更濃，蠔肉口感順滑，味道甘甜，齒頰留香。

食西餐又點少得沙律呢！簡聚嘅田園沙律有黃椒、沙律菜同蕃茄仔等，顏色繽紛，新鮮而且口感爽脆多汁。清新嘅背後，加上油香十足嘅西班牙火腿，為沙律增加鹹香味道，成件事就係好balance。

口感鬆脆嘅法式多士，一口大小卻乘載住口感南轅北轍嘅帶子同三文魚籽。簡聚嘅日本帶子味道鮮甜而質地柔軟，而三文魚籽口感清脆，咬開就係甘甜濃厚嘅魚油，口感極具層次，而整體味道非常鮮甜，令人一試難忘。

來自西班牙嘅乳豬，肉質特別軟腍，而且油香豐富！薄脆嘅外皮更為乳豬增添香脆口感。至於西餐嘅豬肉通常都會配上肉桂蘋果蓉，恰到好處嘅酸甜正好減低嗰份油膩感。

另一款簡聚嘅主菜揀咗星斑柳。廚師用大火煎香魚柳，令魚油深深鎖上，至於魚肉新鮮嫩滑，加上香脆可口嘅魚皮，令口感層次更為豐富。另一邊廂嘅虎蝦蝦肉肉質彈牙，非常新鮮，沾上特製嘅柚子醬油後，更能提升鮮甜味，味道層次同樣提升。

餐廳名稱：簡聚
地址：元朗元朗安寧路172-190號安寧樓地下A號舖

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com