美富菜館：太子地道小菜風味，讓鑊氣治癒疲憊

繁重嘅工作後，當然要讓美味滿足一下疲憊嘅身軀啦！講到最治癒嘅方法，莫過於約埋成班朋友，叫幾碟熱辣辣又有鑊氣嘅小菜，再配上一杯冰凍大啤酒，慢慢食慢慢嘆吓！位於太子嘅美富菜館海鮮蒸氣火鍋，繁忙時間下廚房爐火全開，鑊氣伴隨住陣陣香味撲面而來，熱鬧氣氛令人不禁聯想到昔日大排檔最鼎盛嘅年代。

美富菜館

天氣又熱又焗，甜中帶酸嘅鹹菜豬肚花甲湯就最適合醒一醒胃喇！美富菜館嘅鹹菜口感爽脆，鹹酸味唔會過濃；豬肚則口感爽滑，食落越𡁻越甘香。美富菜館特意加入花甲，用海鮮令湯底更鮮甜，味道更有層次。

講到代表佬味嘅小菜，首推枝竹火腩煲。火腩皮口感薄脆，醬汁融入豬皮後，鹹香更加突出；而美富菜館嘅枝竹火腩煲更配上肉多骨少嘅魽魚，鮮甜嫩滑魚肉伴隨住火腩嘅肉香，加上充分吸汁變得柔軟嘅枝竹，點可以唔叫多碗白飯呀！

堆疊如山嘅鵝腸，可見美富菜館嘅大廚絕不吝嗇，份量十足！鵝腸好似麵條咁長，清洗乾淨，無內臟嘅臊味；食落爽脆肥美，加上豉油王嘅調味，味道甘香，口感同層次俱全，非常惹味。

餐廳名稱：美富菜館海鮮蒸氣火鍋 Mei Fu Restaurant
地址：太子大南街46-48號地舖

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！