南豐紗廠一日遊 荃灣全新吃喝玩樂好去處

話時話，荃灣全新文化藝術新地標及創意空間「南豐紗廠 (The Mills)」開咗咁耐，M佬都未陪我去睇吓。睇相好似好多嘢睇，所以今日就扚起心肝，嚟一個荃灣南豐紗廠一日遊，同大家介紹吃喝玩樂推介、影相打卡位置同接駁巴士資訊。

M佬一路行，一路講歷史。下刪一萬字，重點大概係咁：50年代，香港製造業興成，荃灣南豐紗廠係製造業嘅龍頭，更係生產量最高嘅紡織廠。隨着製造業沒落同經濟轉型，南豐紗廠1至3廠喺1997年拆卸，成為私人住宅翠豐臺。而4至6廠直至2008年先正式停止營運後，改成貨倉。去到2014年，南豐紗廠活化工程正式開始，銳意將南豐紗廠改為文化藝術新地標同創意空間。經過差唔多四年嘅時間，終於喺2018年12月6日開幕，成為文青假日消閒好去處，影相打卡！

荃灣南豐紗廠保留咗好多昔日舊工廠嘅特色同原始裝置。大樓保留咗當年外牆「南豐紡織有限公司」嘅古老字款，塗上新漆。大樓仲保留舊窗框、廠房樓梯、柱樑等。另外，南豐紗廠裏面放好多個太平桶，因為紗廠以前未有自動滅火系統，太平桶就係用來滅火，好特別！

「無名英雄」巨型畫像
如果大家喺白田壩街南豐紗廠嘅入口行入去，就會見到外牆嘅「無名英雄」巨幅肖像畫，係由葡萄牙藝術家 Alexandre Farto創作，象徵香港上一代嘅奮鬥回憶，向昔日嘅紡織業工人致敬。再配埋南豐紗廠嘅古老字體，令人耳目一新。絕對是南豐紗廠的標誌！

白田壩里壁畫街
行入去白田壩里，有一系列壁畫，由六位本地藝術家創作，圍繞紗廠嘅過去、現在與未來，絕對係打卡影相幾好位置！M佬，快啲同我影多幾張相啦！

紗廠公園 + 跡織繪
南豐紗廠將部份戶外地方活化成公園，其中一個就係紗廠公園，可以欣賞到南豐紗廠嘅大樓，仲有大量嘅枱櫈，買杯嘢飲坐喺度都幾舒服！

行到公園嘅盡頭仲有《跡織繪》，係由林東鵬同COLLECTIVE共同創作，由多塊鐵片組成，畫中講述香港嘅布故事！

紗廠耕地
南豐紗廠另一大樓嘅天台就活化成「紗廠耕地」，可以俾人租用種植農作物，見到有啲餐廳都喺度中香草同蔬菜。

一路行，就愈覺得南豐紗廠係文創商場，總共分成三區：「南豐作坊」、「CHAT六廠」和「南豐店堂」，有多間特色手作精品店食店。

南豐店堂
南豐店堂引入好多首次喺香港設立門市嘅品牌，包括：新加坡傢俱品牌Commune、回收物料樣辦社企Make in sample、特式文具品牌Modena、香港網上家品平台 ToniTownie、本地自家設計手錶品牌EONIQ等。

另外，仲有好多特色餐廳，例如：以食用花為主題餐廳Fleur，日本拉麵店哲麵、台灣文青茶室木衛二鑄茶所等。

仲有啱晒一家大細嘅The Big Things，有餐廳同埋小朋友嘅玩樂區，帶啲小朋友嚟放電就最啱啦！

CHAT 六廠
六廠紡織文化藝術館喺南豐紗廠保育項目之一，展出紡織藝術、昔日紗廠機器同用具等藏品，可以認識香港紡織業嘅創新精神。中間高樓底嘅大堂係CHAT 六廠嘅亮點，拆走咗廠房嘅部分天花同地板，打通成為大堂，玻璃天花引入自然光，好舒服！

南豐作坊
南豐紗廠嘅另一目的就係培育香港時尚科技嘅發展，南豐作坊提供相關資源同培育計劃，其中techstyle提供零售空間同培育基地。

免費接駁巴士服務
南豐紗廠設有免費接駁巴士服務，上落車站設於荃灣政府合署對面 (近荃灣港鐵站A4 出口) 同南豐紗廠停車場，指定服務時間每20分鐘一班，可參閱穿梭巴士時間表。

世界各地／香港景點門票邊度買至平？
–> 詳情請睇：https://wp.me/p8vzXP-6G <–

南豐紗廠 The Mills
開放時間：星期一至日 10:00am – 10:00pm
個別商店及餐飲的營業時間可於網站內查詢：商店/其他 ，餐飲
地點：香港荃灣白田壩街45號
網址：www.themills.com.hk/

（記住Like同Share畀朋友）