幻彩詠香江 天星海港遊

唔知你哋鍾唔鍾意坐船呢？有時返工好攰好大壓力，我A姐都會特登坐天星小輪過海，由中環去尖沙咀，每次望住維港兩岸嘅景色，慢慢就會放空，放鬆心情就落船，原來坐船不知不覺成為我生活中嘅小幸褔。今日M佬就帶我坐天星海港遊，同我慢慢咁欣賞維港景色，仲可以欣賞埋幻彩詠香江，原來除咗幸福，仲好浪漫呀！

天星小輪
天星小輪始創於1898年，接載乘客往返港九兩岸，相信你都一定搭過，而現有渡輪航線為尖沙咀往返至中環同尖沙咀往返灣仔航線，絕對係過海嘅最平選擇！

天星海港遊
喺1999年天星小輪被《國家地理旅遊雜誌》列為「人生50個必到景點之一」！如果想細味維港，慢慢咁欣賞兩岸景色，天星海港遊就更加適合，一個小時嘅航程，可以不停打卡影相，其實香港真係好靚呀！

尖沙咀天星碼頭
當中環同灣仔嘅天星碼頭重建，位於尖沙咀嘅天星碼頭更有歷史嘅韻味。天星海港遊嘅登船碼頭設於尖沙咀，更有專用嘅候船室同紀念品店。

世星觀光輪
今次為我哋提供服務嘅船叫「世星」，原來世星本身係往返灣仔同紅磡航線，經過改裝之後，成為全港第一艘由柴油發電同電能推動嘅低排放環保渡輪。世星載客量為408人，分為上下兩層，下層保留原本天星小輪嘅面貌，仲設有洗手間；至於上層就分為室內同室外兩部份，室外可以270度全景睇維港景色，而室內就有天幕玻璃，加上梳化軟座，好豪華好舒服架！

東面航程
今次我哋選擇咗「幻彩詠香江」嘅航班，喺天星碼頭出發後，就會往東行，前往北角同啟德郵輪碼頭一帶，東面嘅景色雖然無中區嘅商廈建築群吸引，但萬家燈火之下，其實又有另一番感覺。

聖誕燈飾
離開東面，慢慢嚟到尖東一帶，適逢依家係聖誕期間，又點少得睇埋尖東嘅燈飾呢？平時喺海旁睇燈飾，影相非常困難，但依家喺船度影返入去，就可以影晒全景啦！

幻彩詠香江
時間慢慢嚟到晚上8點，船會停喺一個最佳位置，觀賞由維多利亞港兩岸合共47座摩天大樓同地標，以射燈、激光、LED燈嘅幻彩詠香江，而船上亦會播放音樂，等大家可以更完美體驗呢個全球最大型嘅燈光音樂匯演。

西面航程
幻彩詠香江嘅匯演大概為10分鐘，之後，船就會往西行，去到上環同西九龍一帶，最後返回尖沙咀天星碼頭。

黃昏航線
除咗幻彩詠香江航線，天星海港遊亦設有港島東航線同黃昏航線，詳情：維港黃昏遊船河 天星海港遊

世界各地景點門票邊度買至平？
–> Klook：www.klook.com <–
機票、酒店、旅遊產品邊度買至平？
–> Trip.com：www.trip.com <–

天星海港遊 Star Ferry’s Harbour Tour
航班時間表：港島東 15:30、黃昏 17:30、幻彩詠香江 19:30
天星海港遊（港島東）船票：成人 HK$100、3至12歲小童、65歲或以上長者、殘疾人士 HK$70
天星海港遊（黃昏）船票：成人 HK$120、3至12歲小童、65歲或以上長者、殘疾人士 HK$90
天星海港遊（幻彩詠香江）船票：成人 HK$120、3至12歲小童、65歲或以上長者、殘疾人士 HK$90
地址：尖沙咀天星碼頭
網址：www.starferry.com.hk

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com