瞓醒再行山打卡 筲箕灣西灣砲台

假期就梗係要瞓晏啲，養足精神再同A姐去玩啦！前一晚我哋煲劇煲到好夜，結果今日成點鐘先起身，食埋午餐都已經下奏3點，如果想輕輕鬆鬆行吓山又有咩選擇？我哋就推介西灣炮台，路程短又易行，風景以西灣河至鰂魚涌一帶嘅高樓大廈為主，仲可以望到鯉魚門海峽對面嘅將軍澳添，加上舊嘅軍事遺跡，絕對係一個打卡嘅熱點。

提提你
1. 呢度係軍營舊址，可能尚存爆炸品，如果發現可疑物件，切勿任意移動物件並立即報警
2. 大部份為水泥路，唔算太辛苦，屬於初級路線，但都要記住要量力以為
3. 沿路不設洗手間同補給站，記住自備足夠行裝
4. 大家記住保持環境清潔，自己垃圾自己帶走，絕對唔可以破壞大自然環境
5. 勁多蚊，記住做好防蚊措施
前往方法
1. 由筲箕灣港鐵站經柴灣道上，路程約45分鐘鐘，想再輕鬆啲，可以直接搭巴士喺柴灣道鯉魚門公園站落車，就可以慳返15分鐘嘅斜路路程
2. 因為現時鯉魚門度假村封閉，所以唔可以取道渡假村內嘅通道前往西灣炮台，所以想上去炮台嘅，就只可以經配水庫旁邊嘅山路樓梯，再接駁番原有通道前往西灣炮台

鯉魚門軍營
西灣炮台為昔日鯉魚門軍營嘅一部份，建於1880年代，用於對抗入侵維多利亞港嘅敵艦。但落成3年後，因為軍事發展重心轉變為空軍，所以拆除炮台，再安裝高射炮。至二戰後，駐港英軍重新管理鯉魚門軍營至1987年，現已活化成為鯉魚門度假村、香港海防博物館同西灣炮台晨運徑。

明華大廈
1962年分階段落成嘅明華大廈，係香港其中一個好有代表性嘅公共屋邨，亦係少有將天井設於中央走廊兩旁，用以加強大廈嘅通風同採光，同時吸引咗唔少港產電影喺呢度取景。但呢度係私人地方，大家就唔好入去參觀打卡喇，不過，我哋今次行西灣炮台就可以取道明華大廈公眾電梯，連接筲箕灣東大街同阿公岩道，慳返唔少腳骨力。

軍營遺蹟
經配水庫旁邊嘅山林樓梯，行150級左右就可以接駁原有水泥路前往西灣炮台。水泥路兩旁都係樹林，可以遮陰，行得夠舒服，而呢條路亦係昔日軍營嘅主要通道。

行咗一陣就會見到昔日軍營大門，不過，鐵閘早被拆除只保留住大閘嘅門柱。

通過大門之後，就會見到昔日嘅軍火庫同防空洞，除咗係打卡熱點，亦係一個值得大家回味嘅歷史古蹟。

鯉魚門公園
晨運徑嘅終點就係鯉魚門公園，炮台同軍營已經活化成鯉魚門公園一部分，喺休憩處嘅高處可以睇到西灣河至鰂魚涌一帶嘅高樓大廈同對岸嘅將軍澳。

世界城市標示柱
香港一向比較少見呢類型嘅距離標示柱，單從上面嘅城市睇得出，當時香港係面向世界，因為城市除咗北京之外其他都係亞洲以至世界各地嘅城市，相信如果呢個距離標示柱係近年興建，將會出現好多中國城市。

發射站
上到最高嘅就係發射站，喺呢度就可以睇到柴灣同杏花邨一帶嘅風景。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

西灣砲台 Sai Wan Battery

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com