超靚景打卡 汀九灣泳灘
香港係一個沿海城市，所以有唔少公眾泳灘。喺夏天嘅時候，好多人都鍾意去泳灘消吓暑，玩吓水上活動。大部份嘅泳灘都集中喺離島區、西貢區同南區，其實荃灣都有唔少泳灘㗎！今日我哋自駕遊嘅拍拖好去處就嚟到汀九灣泳灘，雖然因應近期天氣同疫情情況，我哋未有落水玩，但因為呢個海灘鄰近汀九橋同青馬大橋，所以都好適合大家嚟打卡影相㗎！
提提你
1. 如有雷暴，無救生員當值或當紅旗同鯊魚警告旗懸掛嘅時候，就千祈唔好落水
2. 沙灘鄰近民居，大家保持適當音量，唔好影響當地人嘅生活
3. 保持環境清潔，自己垃圾自己帶走，唔可以破壞大自然環境
前往方法
喺荃灣站或荃灣西站都有唔同嘅巴士同專線小巴前往汀九灣，但要留意部份班次只係週一至五嘅繁忙時間提供服務，其中九巴53同234B就全日服務，喺汀九站落車，行3-5分鐘即可到達海攤！如果好似我哋咁自駕遊嘅，其實路邊都有唔少咪錶位，夠晒方便。
汀九灣泳灘
汀九灣泳灘係一個位於維多利亞港都會區西北端嘅公眾泳灘，係荃灣區其中兩個可以「在維港範圍游泳」嘅泳灘。
落車後要行入泳灘，要先經過民居。A姐話喺度住嘅居民真係好幸福，可以日日勁方便去到海灘曬太陽同游水。
汀九灣亦有更衣室同沖洗嘅地方，方便泳客。但其實呢度嘅沙唔算幼滑，但海水都算乾淨，但重點當然係面前嘅汀九橋同青馬大橋啦！喺呢度游水確實好寫意。
汀九灣泳灘 Ting Kau Beach
地址：汀九青山公路汀九段11咪
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
