週末閒遊 機場以外的赤鱲角

香港有咁多海島（總共有成263個島），咁你又唔知頭面積最大嘅三個島嶼係邊幾個呢？長洲？大嶼山？南丫島？等我依次序話你知正確答案啦：大嶼山、香港島、赤鱲角。赤鱲角經過填海後，取代南丫島成為三甲位置，而赤鱲角除咗機場客運大樓，酒店同禁區內嘅跑道之外，原來都有唔少秘景，不如今個weekend就去神探赤鱲角啦！

第一站：赤鱲角機場維修區
上篇，我哋就已經介紹過赤鱲角機場維修區，如果你都想去睇飛機起飛同降落，不妨嚟呢度打卡影相啦！（詳情按此）

赤鱲角機場維修區 / 南環路悠閒徑 South Perimeter Road Traffic Calming Street
地址：赤鱲角南環路

第二站：機場古物園

喺機場古物園外，有幾個停車位，但要留意，呢啲車位只限機管局使用，間中會有職員巡邏，所以如果你諗住揸車嚟，咁就要先將部車泊喺東涌，再轉巴士或由東涌站行過嚟喇。

從前嘅機場古物園綠草如茵，除咗野餐，仲有飛機車軚同填海工程時用過嘅吸泥船之巨型絞刀畀大家影相打卡，但依家竟然變成咁，唔知遲啲會唔會變番靚啲呢？

機場古物園 Hong Kong International Airport Historical Garden
地圖：赤鱲角南環路

第三站：古窯公園

喺機場古物園旁邊嘅就係古窯公園，喺1991年興建香港國際機場嘅時候，就首次喺香港發現元代嘅遺跡，出土超過10個鑄爐，依家就喺呢度擺放咗一個鑄爐仿製品同簡介展板畀大家參考。

古窯公園 Ancient Kiln Park
地圖：

第四站：觀景山涼亭

觀景山山高約77米，全程路段500幾米，由山腳步行至山頂嘅路以梯級同斜路為主，行到終點嘅涼亭大概需要25分鐘。

沿路上最震撼嘅，應該就係經過昂坪360嘅機場島轉向站，一架架吊車就係頭頂飛過，轟轟轟轟嘅聲音，真係唔講得笑。

行到觀景山山頂，有唔少攝影發燒友已經揀定靚位，影機場、油庫以及港珠澳大橋嘅景色，聽講，夜晚嘅油庫配上燈光，影相係一流㗎！

觀景山涼亭 Scenic Hill Pavilion
地圖：

第五站：機場緩跑徑

傳說中，喺九龍跑步係有機會捕獲發哥，而喺機場緩跑徑就有機會遇上好多“Sam哥”！講緊嘅係機師呀！機場緩跑徑由東涌做起點，至國泰城附近為終點，好多住喺東涌或一帶酒店嘅機師，都會不時喺呢條緩跑徑做運動㗎！

就算見唔到“Sam哥”，一路上都有問題展版，當你跑到攰，不妨停一停，玩吓小遊戲啦！

機場緩跑徑 Airport Trail
地圖：

世界各地／香港景點門票邊度買至平？
–> 詳情請睇：https://wp.me/p8vzXP-6G <–

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com