【素食者情報】6間必嘆人氣素食自助餐推介
【香港素食餐廳自助餐推介】A姐聽到各位姊妹嘅訊求，想我哋介紹多啲素食餐廳，當然無問題啦！知道近年大家關注多咗健康，所以食素年輕化，甚至出現咗一股素食熱潮，而我自己都有食齋嘅習慣。不過，有唔少好似M佬呢啲大胃王成日都覺得食素唔夠飽，所以素食自助餐就啱晒佢哋啦！有唔少素食自助餐甚至有魚生、口水雞、漢堡扒、鹽酥雞等各種菜式，選擇非常豐富，即吓睇吓以下必嘆人氣素食自助餐推介啦！
香港素食餐廳自助餐推介 | 1. 素食自助餐：日常素食 Daily Green
詳情：健康一點點放題 黃大仙日常素食
地址：黃大仙龍翔道136號黃大仙中心北館2樓N201-N202及N226A號舖
營業時間：星期一至日 11:30 – 22:00
香港素食餐廳自助餐推介 | 位於黃大仙嘅日常素食，主力做街坊生意，所以價錢非常大眾化，但選擇一啲都唔少！熟食超過20款，主要為中式素菜，選擇有咕嚕肉、腐竹炆涼瓜、荔芋扣肉、五柳魚、炒粉麵飯同點心等，餐廳亦會不定時更新菜單！除咗中式素菜，日常素食嘅素食自助餐亦有提供少量和風選擇，好似壽司卷同天婦羅，夠晒驚喜。
香港素食餐廳自助餐推介 | 2. 素食自助餐：心裡有素 Veggiemind
詳情：精緻の素食自助餐 油麻地心裡有素
地址：油麻地廣華街38號地舖
營業時間：星期一至日 11:045 – 21:15
香港素食餐廳自助餐推介 | 心裡有素以近年大熱嘅素食自助餐為主打，分為午餐、下午茶同晚餐三個時段，用餐時間60-90分鐘。唔好以為素食就好悶好寡，油麻地嘅心裡有素，食物高質精緻，最重要係價錢親民又抵食！油麻地心裡有素嘅素食自助餐嘅菜式選擇相當豐富，前菜冷盤、新鮮沙律、炒粉麵飯、家常餸菜、炸物蒸物、湯品粥品、飲品甜品等，應有盡有，餐廳更不含五辛（即蔥、蒜、韭菜、蕎頭同洋蔥），所以亦非常適合五辛素食者。
香港素食餐廳自助餐推介 | 3. 素食自助餐：每日 Everyday
地址：尖沙咀山林道10-12號山林閣地舖
營業時間：星期一至日 11:45-22:00
香港素食餐廳自助餐推介 | 山林道有唔少餐廳，例如日本菜、韓國菜、火鍋店、新派中菜、西餐等等，其實仲有一間人氣素食自助餐：每日素食。每日素食提供嘅素食自助餐食物選擇非常豐富，熱盤大約有十款選擇，加上前菜、炸物、沙律、甜品、湯同飲品，加加埋埋有成50款，當中必食推介有素咕嚕肉、素漢堡包同素豬腳薑，每次一refill就會轉眼清晒，係唔少素食大胃王嘅飯堂！
香港素食餐廳自助餐推介 | 4. 素食自助餐：樂園素食 Paradise Veggie
地址：銅鑼灣謝斐道535號Tower 535地庫B04號舖
營業時間：星期一至日 11:00 – 23:00
香港素食餐廳自助餐推介 | 如果你係素食初哥，我就推介位於銅鑼灣嘅樂園素食。樂園素食嘅素食自助餐選擇超過60款，餐廳最大賣點就係壽司區，加埋豉油同wasabi，真係有一種新鮮魚生嘅感覺，幾可亂真！除咗壽司區，另一個人氣區域就係串燒區，所有串燒即叫即燒，包括車厘茄、茄子、雞髀菇、冬菇、竹輪卷、香腸、漢堡扒等，每次去樂園素食，我總會有一刻唔記得自己係食緊齋呢！
香港素食餐廳自助餐推介 | 5. 素食自助餐：素來素往
地址：大角咀博文街28-38號地下6號鋪
營業時間：星期一至日 11:30 – 22:00
香港素食餐廳自助餐推介 | 素來素往嘅素食自助餐選擇雖然唔多，但菜式就非常花巧，食嘅絕對係師傅嘅手工，例如：口水雞、酸辣粉、鎮江骨、海鮮Pizza、港式咖喱魚蛋、煎釀三寶、紅燒獅子頭、回鍋肉、東坡肉、鹽酥雞同香酥鴨等等，淨係睇呢個菜單都知唔簡單啦，但餐廳仍然不斷進步，近期更推出菜膽鮑魚、北孤扒海參、足料碗仔翅等素鮑參翅肚，真係每次去素來素往都充滿新鮮感！
香港素食餐廳自助餐推介 | 6. 素食自助餐：無肉食 Ahimsa Buffet
地址：北角堡壘街10-16號華曦大廈地下B舖
地址：中環嘉咸街23號My Central地下5號舖
地址：旺角洗衣街88號2樓
地址：荃灣大河道98號如心廣場商場二期2樓213號舖
地址：將軍澳唐賢街19號天晉匯II期地下20號舖
香港素食餐廳自助餐推介 | 無肉食係少數多分店嘅素食自助餐，餐廳出品非常精緻，過擇有煎炸類小食、沙律吧、熱盤、老火湯、甜品同糖水等等，我哋就推介炸腐皮卷，真係非常鬆脆，而餡料有椰菜、木耳、紅蘿蔔等，口感一流架！但講到招牌菜就一定係拔絲蕃薯，因為拔絲蕃薯真係非常壯觀，係無肉食嘅打卡名物。
相片來源：餐廳官方社交網站
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
