權八Gonpachi：一「拳」中的，A姐M佬拳拳到肉，帶你開始享受生活

有一日，M佬突然話「有些事現在不做，一輩子都不會做了」，我嗰陣覺得佢好型，無啦啦都可以講句咁熱血嘅野。點知……原來係抄五月天歌名嘅……不過就係因為咁，開始咗我哋嘅死亡筆記……啊！打錯咗！應該係玩樂日記。講多無謂，開張大吉！M佬特登揀咗位於銅鑼灣利園一期4樓嘅日本權八居酒屋 (Gonpachi)，賀一賀佢。權八於日本大有名氣，餐廳參照傳統江戶時代嘅居酒居設計，環境清幽，傾計聚舊一流。

聽講日本權八有一個傳統，就係喺舖頭中設有蕎麥麵製作室，令大家可以欣賞製麵過程情況。香港店當然都唔例外，每個食客進入餐廳嘅長廊都必定會經過製作室。大家認真要試下呢到啲蕎麥麵，爽滑彈牙，有好香嘅蕎麥味。配合埋由厚鰹魚、鰹魚花、青魚乾製成的蘸汁，蔥同芥末，食到我哋要encore追加。我哋走去問侍應，發現原來呢到嘅蕎麥麵係由百分百蕎麥製成，無加過任何麵粉。

餐廳特設清酒亭，更嚴選咗有88款特盛清酒。我哋諗住賀一賀佢，點咗榮獲Monde Selection 2010金賞嘅櫻室町備前幻純米吟釀，口感濃郁渾厚。

我哋叫咗嗰精選5點刺身，份量唔多，不過勝在夠新鮮。最鐘意食蝦刺身嘅M佬，食到嘩嘩聲，喺咁話啲蝦好膠口好新鮮。

權八嗰手作豆腐，望嗰表面就知佢滑嘟嘟，唔捨得整爛佢嚟食。配埋淡豉油同柴魚片嚟食，唔會好淡，豆味濃郁。

呢到設有串燒亭，師傅即場表演燒串燒，啲味香到想叫多幾串。就算唔鐘意食內臟嘅我都覺得嗰牛舌串好好味。啱啱熟，有濃郁嘅牛味。另外，葱串燒就食得多，但第一次跟埋麵豉一齊食，無諗過都幾夾，食落無咁寡。

M佬真係好細心，叫咗我最鐘意食嘅銀鱈魚西京燒。條魚好肥美，夾埋嗰醬汁，唔係好咸，啱啱好。伴碟嘅配菜最有驚喜，有新鮮嘅杏脯肉，甜甜地，中和返啲咸味。

整體嚟講，今晚埋單千八蚊，餐廳環境一流，食物質素有保證，加埋啲配料嚟食有驚喜。只係份量較少，唔啱大食嘅M佬。

權八居酒屋 (Gonpachi)
地址：香港銅鑼灣希慎道33號利園商場一期4樓
電話：+852 2787 3688
營業時間：星期日至四 11:30 – 01:00，星期五、六及公眾假期11:30 – 02:00　Facebook：www.facebook.com/gonpachihk

（記住Like同Share畀朋友）

---

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMdiary
Pinterest：AandMDiary
Openrice：A姐M佬
報料或合作：aandmdiaryhk@gmail.com