一個海港只有一個小漁港太子小漁港蒸氣火鍋

曾幾何時，我叫M佬帶我去食蒸氣海鮮鍋，不過，佢話好貴，所以講吓講吓就無咗件事。直到今日，行過呢間位於太子嘅小漁港海鮮舫鮮蒸‧鮮味火鍋，再望望個價錢，又幾化算喎，我都未開口，M佬已經衝咗入去喇！入面好多人喎，都唔知要等幾耐先有位呢？

突然間…

M佬：姓M呀！訂咗兩位！

吓！咁鬼馬！原來佢知我想食海鮮鍋好耐，特登訂定枱帶我嚟一圓心願！我要快d share畀我啲姊妹睇先！！

店如其名嘅小漁港，牆上貼咗好多漁船、港口嘅相片同漁船模型，真係好有feel呀！呢度嘅店主好nice㗎，會同你介紹今日有咩新鮮，如果唔靚，佢真係會叫你唔好食呀（當然我見隔離枱堅持要食啦）。仲會同你傾吓閒計，講吓笑，服務態度好好㗎！

三寶刺身（三文魚+花竹蝦+象拔蚌）

師傅好有心機咁將刺身整到一朵朵花，賣相好得。再睇真啲，嘩！個蝦頭仲郁緊㗎！好新鮮呀！我咁大個女都係第一次食個蝦係咁彈牙，咁juicy呀！而象拔蚌都好驚喜，好爽口好脆呀，個種鮮甜真係無得輸！至於三文魚都好肥美，好想encore呀！

海鮮蒸鍋套餐

呢度每個蒸爐都有計時器，一開就即刻有蒸汽出，而呢到係會逐層逐層蒸，咁就唔怕海鮮蒸得太老啦！不過，員工就忙咗好多，難得佢地嘅服務態度仲要好好添！

除咗鮮甜，我真係無其他形容詞！絕對認同「海鮮都係蒸的好」，強烈建議，連豉油都唔好落，咁先食到嗰鮮甜味！

元貝用蒜蓉粉絲蒸，完全吸收哂元貝嘅精華，好惹味呀。大連鮑就好有咬口，好彈牙！而蒜蓉花竹蝦就夠晒新鮮，蒜蓉味好match呀！

隻蟹好多好好多膏呀！好鮮甜，停唔到口呀！店主仲提醒我哋要快啲食，如果唔係膏就會變硬喇！糯米飯都唔遜色，吸晒深海龍躠嘅精華！

甜梅菜蒸菜心

最後，食番個菜先！菜心吸收了梅菜嘅甜，原來蒸菜係咁好味㗎！

食到飽飽仲有甜品送，真係非常超值！

小漁港海鮮舫鮮蒸‧鮮味火鍋
地址：太子荔枝角道127-133號地下
營業時間：星期一至日 18:00-02:00
電話：+852 2868 9863

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com