下個二月願如期團聚於德國某地方！觀塘February試歎德國菜
觀塘嘅工廠大廈銳意改造，所以越嚟越多餐廳落戶，除咗食工業風，又點少得一啲外國勢力呢！呢間主打德國菜嘅February，一入去已經見到張bar台，好多酒呀，真係好似去咗啫文尼咁！再望望個餐牌，晚餐除咗經濟實惠嘅2人餐同4人餐，À la carte都有多款唔同主菜，湯、沙律、小食、飲品同甜品揀。因為M佬想食豬手，我又想食腸仔喎，目標明確，所以一人一個餐啦！龍蝦忌廉湯：上枱都仲出緊煙，仲飄嚟陣陣龍蝦味添！相機食完到我A姐食喇！加上湯入面仲有絲絲龍蝦肉，配埋忌廉，好滑呀。不過，味道就唔算好濃郁，同埋比較稀，老老實實，要加$60就唔算十分吸引喇！
德國腸拼盤：4款唔同腸仔合共7條，各有特色：有juicy嘅牛仔腸、脆口嘅法蘭克福腸、爆漿嘅芝士腸、同香草味濃嘅昆布蘭腸。但無論咩口味，都好有咬口，肉味香濃！
德國火焰咸豬手：未住先，我淨係見到大大隻豬手，點火焰先？唔好心急，店員就將隻豬手淋咗冧酒再點火！嘩！焚身似火呀！燒到脆卜卜，店員就會將你隻豬手拎番入廚房切件。
豬手燒得啱啱好！皮脆肉嫩，仲好有肉汁，同淡淡酒香，配埋開胃嘅伴碟芥末薯仔沙律同酸菜絲，好match呀。
有得睇又有得食，都唔錯架！不如，下個二月願如期同你嘅最愛團聚於德國某地方啦！
February
地址：觀塘駿業街56號中海日升中心2樓A號舖
營業時間：星期一至六: 11:30-23:59；星期日: 休息
電話：+852 2237 1119
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
