和牛嚡口 服務又差 旺角大將
最鍾意打邊爐嘅我哋，今日就嚟到位於旺角T.O.P商場Food Court嘅新開日式火鍋放題店：大將。因為餐廳新開，所以裝修新束，光鮮明亮，坐得好舒服。但除此之外，絕對唔值得推介畀大家，除咗服務差，上菜慢同漏單，最重要啲牛肉係嚡㗎，又貴又唔好食囉！
服務水平
可能因應疫情，食客減少，所以餐廳只有兩個職員當值。我哋一坐低之後，店員都好有禮貌幫我哋落單，我哋今日就order咗店內最高級嘅澳洲和牛套餐，店員仲特別提醒，第一轉會將所有肉類先上一次，之後再用自己電話Scan QR Code落單。等咗5分鐘，就上咗2碟美國特上牛，但等多咗10分鐘都未見其他肉類，最驚係店內一個店員都見唔到，肚餓嘅M佬決定去搵個店員了解吓，原來佢哋喺角落頭睇緊馬經囉！當我哋詢問其他肉類係未準備緊，佢竟然話已經上齊！唔係呀？！我哋叫澳洲和牛，你就上套餐內最cheap嘅美國特上牛，其他雞、豬同牛都無見過。話想搵個職員問吓，你哋就去晒蛇王，令我哋90分鐘嘅放題就係咁浪費咗15分鐘！勁嬲呀！
澳洲和牛
終於最功落單，呢個澳洲和牛套餐可以order店內所有牛肉嘅選擇。根據牛肉質素，依次序為澳洲和牛、美國SRF和牛、美國嚴選極上牛同美國特上牛。我哋第一轉就叫咗4碟澳洲和牛，結果只係嚟咗2碟；第二轉就叫咗2碟美國SRF和牛，結果就嚟咗4碟！點解最貴個款和牛就特登嚟少啲，而平少少嗰款就特登嚟多啲呢？我相信佢想用平啲嘅牛令我哋飽啲，咁就可以控制成本啦！澳洲和牛嘅雪花紋路好靚，望落去嘅脂肪分佈好平均，但點解係嚡嘅，完全唔滑，個問題係出自佢把刀定本身牛肉嘅質素呢？結果我哋食咗2碟澳洲和牛就放棄，早知就唔叫最貴嘅澳洲和牛套餐啦！
美國SRF和牛
呢款美國SRF和牛雪花紋路都唔差，肥瘦比例啱啱好，但相比澳洲和牛反而更嫩滑，肉味更濃郁。
美國嚴選極上牛
呢款牛肉嘅雪花紋路相對差啲，但肉味香濃，我哋覺得係合格嘅。
美國特上牛
脂肪部份太多，肉色死實，如果唔係店員話第一轉會將所有肉類先上一次，絕對唔會叫。
豚梅肉
除咗牛肉，豬就有五花腩同豚梅肉選擇，豚梅肉一啲都唔肥，食得相對健康，唔錯。
新瀉縣雞肉
咁多款嘅肉類選擇，我哋就最鍾意新瀉縣雞肉，雞肉超嫩滑，肉味香濃。
蔬菜、丸類同粉麵
喺自取區嘅配料選擇超多，特別係丸類。整體擺盤都幾靚，不過，refill速度就有啲慢。
炸雞
喺電話落單，仲有呢款熟食選擇，不過，圖片欠奉，因為係漏咗幾次單，我哋唔再order喇！
甜品
甜品有自製窩夫同雪糕，可以加入自己鍾意嘅雪糕口味同埋topping。
大將 Taisyou
地址：旺角彌敦道700號T.O.P This is Our Place地庫FoodYum R1號檔
電話：+852 2333 3258
營業時間：星期一至日 11:30 – 23:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
