廟街精品火鍋 佐敦打邊爐
M佬今朝message我，話今晚約我去打邊爐，仲話係主打海鮮嘅精品火鍋添，我梗係say YES啦！之後佢就忙住開會，一直到我收工都無再收過佢嘅message，究竟可唔可以話我知係邊度打邊爐呀？！平時我會去到餐廳附近行吓街，再等佢OT完一齊食飯，但今日我只好無奈咁坐喺公司等到佢收工，佢陣間就知味道！終於等到佢收工，原來原來原來，今晚係去佐敦嘅打邊爐度打邊爐呀！
枝豆
今晚嘅打邊爐非常豐富，清清哋嘅枝豆餐前小食就Perfect啦！枝豆漲卜卜，好有咬口。
墨魚滑油炸鬼
超食二人套餐包特色小食，墨魚滑油炸鬼入面釀入彈牙嘅墨魚滑，配埋趣卜卜嘅油炸鬼，口感一流，非常有層次。
滋味辣雞煲
雞煲可以揀BB辣、小辣、中辣、大辣同魔鬼辣，我哋揀咗小辣！上枱睇呢半隻雞嘅份量相當多，聞上去就有濃郁嘅麻辣味！至於食就相當刺激，又麻又辣，好有層次！雞肉入晒味，索晒汁。至於食雞煲除咗雞，更重要當然係啲配料啦，芫茜、唐芹同紫洋蔥都非常惹味。
海鮮拼盤
我哋揀咗海蝦、奄仔蟹同蟶子皇，份量啱啱好！海蝦新鮮大隻，肉質結實，鮮味十足；奄仔蟹鮮甜同勁多膏，但我哋最鍾意嘅就係蟶子皇，大大隻又爽口彈牙，勁鮮甜呀！
特級日本櫻花牛肉
櫻花牛肉放喺冰塊上面，以保持新鮮！牛肉雪花分布均勻，牛味濃郁，接近入口即溶，輕輕淥一淥就食得啦！
西洋菜帶子餃拼XO鮑魚蝦餃王
嚟到打邊爐，就一定要試吓呢度嘅自家製餃喇！呢度嘅餃配搭非常特別，仲睇得出係經過細心設計。西洋菜好鮮嫩配上彈牙帶子餃，食落口感一流；至於XO鮑魚蝦餃王就夠晒矜贵，XO醬入晒味，而鮑魚配上蝦，真係超彈牙。
雜菜盤
蔬菜好新鮮，娃娃菜色澤嫩黃，味道鮮甜。
紅豆沙
套餐飲品可以揀竹蔗水或薏米水。最後食埋紅豆沙真係好滿足，陳皮味香濃，紅豆飽滿。
打邊爐 The Hot Pot
地址：佐敦廟街286-298號華志大廈地下A號舖
電話：+852 2562 2256
營業時間：星期一至日 17:30 – 02:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
