海天花園酒家：海鮮以外的小菜同樣驚喜

去屯門三聖就梗係食海鮮啦！呢度嘅海鮮餐廳選擇多，而且海鮮都係自己買完再加工，所以每間酒家嘅分別其實唔大，如果想比較嘅話，當然要由小菜入手啦！海天花園酒家係三聖食海鮮嘅名牌之外，佢嘅叉燒更加係隱藏嘅強項，令我哋有海鮮以外嘅驚喜！

海天花園酒家

厚切嘅叉燒肥美肉厚，面層沾滿惹味嘅蜜汁，加上燒得香脆嘅焦邊，口感同味道同樣俱備，係海天花園酒家隱藏嘅強項！

海天花園酒家嘅花膠北菇鵝掌煲經長時間炆煮，全部都夠晒入味：北菇厚身但口感軟腍、鵝掌炆得勁入味，皮滑肉嫩、花膠夠膠口又黏嘴，索晒其他食材嘅味道，充滿骨膠原。

海天花園酒家嘅脆香骨即叫即炸，炸到金黃色，外層酥脆而肉汁豐富又嫩滑，加上啖啖嘅南乳香味，層次感更為豐富。

將食材釀入滑豆腐，絕對係考師傅技術之作！喺軟滑而豆香豐富嘅豆腐上釀入魚肉同蝦米，鹹香又惹味，送飯一流！

餐廳名稱：海天花園酒家 Hoi Tin Garden Restaurant
地址：屯門青山灣三聖邨三聖街5號地舖
營業時間：星期一至日 09:00 – 23:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！