燒烤火鍋點樣揀 長沙灣東京の味
近年多咗好多一人餐廳，自己一個嘆燒烤，自己一個嘆火鍋，絕對是i人的福音！而新開張嘅長沙灣東京の味，除咗適合i人之外，亦能滿足e人，餐廳更分開燒烤區同火鍋區。我哋今次就先食火鍋，食材同價錢都相當吸引，所以下次要再嚟試埋燒烤啊！
牛胸腹肉日本豚放題套餐
同大部份90分鐘日式火鍋放題一樣，餐廳按牛肉等級分為不同價錢，我哋今次就揀咗牛胸腹肉日本豚放題套餐。至於湯底亦有六款選擇，昆布鰹魚鍋、櫻花蝦豚骨鍋、意式蕃茄芝士鍋、山椒味噌鍋、養顏美肌鍋，至於食shabu shabu，我哋就最鍾意日式壽喜燒鍋喇。
熟食區
落完order之後，肚餓嘅我哋先去熟食區。熟食區嘅選擇除咗天婦羅，亦有關東煮同麻辣燙。特別喜愛入晒味嘅麻辣雞腎，唔會太辣，但麻香十足，非常醒胃。
美國牛胸腹肉
呢個套餐嘅牛肉選擇有兩款，而牛胸腹肉就係呢個餐嘅重點。牛胸腹肉嘅賣點唔係雲石花紋嘅脂肪，反而係脂肪含量較少，肉味香濃，而且淥熟後嘅肉質收縮，反而帶有一種爽脆感。
北海道夢之大地豚肉
除咗牛肉之外，呢個餐嘅北海道夢之大地豚肉係另一焦點。油脂分布平均嘅豚肉同牛胸腹肉形成強烈對比，肉質嫩滑，油香豐富，一碟接一碟。
自取區
90分鐘嘅放題，除咗肉類任食之外，餐廳亦設有自取區，選擇非常豐富呢！除咗丸、麵類、雞脾肉之外，就連墨魚仔同蠔都有。而我哋大推嘅當然係蠔啦！雖然蠔肉係冰鮮嘅，但非常鮮甜，而且大大隻，極具口感，一個人不知不覺就食咗十隻。
蔬菜區
自取區當然唔少得蔬菜嘅部份，就連比較少見嘅萵筍都有，讓綠色嘅食物參與火鍋，食嘅時候都好似健康啲啦！
東京の味 Tokyo Taste
地址：長沙灣東京街31號恆邦商業大廈地下3號舖及1樓
電話：+852 2422 2222
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
