精緻細心的西餐 天后On the Spot Cafe Bar Restaurant

前排工作關係嚟到天后，同事帶我去On the Spot Cafe Bar Restaurant食lunch，發覺環境同食物都唔錯，所以今日就帶A姐去chill下。雖然已經去過一次，但餐廳嘅入口比較難搵，我哋都行咗唔少冤枉路。所以大家記住係喺琉璃街同電氣道交界個轉角位，先係大廈嘅入口呀！

On the Spot Cafe Bar Restaurant
On the Spot Cafe Bar Restaurant係上年12月開張，所以裝潢仲好新簇，加上環境寬敞舒適，坐得舒服，空間感十足，嚟high tea傾吓計都唔錯。另外，drink menu選擇多，放工同同事黎飲杯酒，都係一個唔錯嘅選擇。而主廚亦好著重客人嘅新鮮感，所以set menu會不時更新，而餐前嘅小食同餐湯都會隨住食材嘅供應而改變。

椰菜花忌廉湯
今日嘅餐湯係椰菜花忌廉湯，椰菜花先用牛油焗過，再打滑而成，配上鬆脆嘅自製麵包粒，餐湯入口綿滑，非常creamy，而麵包粒亦相當鬆脆。

三文魚籽慕斯撻
前菜係三文魚籽慕斯撻，自製嘅撻皮相當鬆化，加上三文魚籽慕斯嘅咸香，令人十分開胃。

羊臀肉
大部份餐廳都係提供羊架，而On the Spot Cafe Bar Restaurant啱啱更新嘅Menu上面就出現少見嘅羊臀肉。羊臀肉比羊架嘅肉質相對厚實，肉味亦相對濃郁，怕羊酥味嘅朋友可以點少少煙燻乳酪嚟中和番，而羊咩控嘅朋友仔就可以配上牛骨熬製而成嘅燒汁，肉味就會大大提升。除咗主角嘅羊臀肉，伴碟仲有茄子、泰國蘆筍同粟米仔，值得一讚嘅係蘆筍仔相當新鮮幼嫩，而且擺盤亦睇得出主廚有意用顏色嚟營造對比，伴菜用上綠色嘅蘆筍、黃色嘅粟米仔，以白色嘅煙燻乳酪作佈景，含蓄地將食客由伴碟菜引導到主菜，絕對係色香味俱全！

安格斯西冷扒（8安士）
另一份主菜就叫咗安格斯西冷扒，醬汁同樣配上牛骨熬製而成嘅燒汁，配菜就有本地水耕菜、薯條或洋蔥圈。平時出街食牛扒都會因為油膩而食剩d薯條，但新鮮嘅水耕菜將牛扒油膩帶走，要清碟完全無難度。相對於羊臀肉富有層次感嘅擺盤，充滿肉汁既西冷扒配上滿滿既水耕菜同薯條，就相對豐富得多，令人相當滿足。

On The Spot Cafe Bar Restaurant
地址：天后電氣道68號金輪天地8樓
電話：+852 3583 3188
營業時間：星期一至日 12:00 – 23:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com