雪糕泡芙當選2017米芝蓮小食推介？一試究竟Owl’s Choux.Gelato.Coffee

眾所周知，我哋一向都唔好甜品，但今日喺尖沙咀食完飯之後，A姐竟然拉我去食甜品？佢話要試吓呢間當選2017年米芝蓮小食推介，主打雪糕泡芙嘅Owl’s！

一路行一路都覺得好奇怪，明明A姐唔鍾意食甜嘢架，但行到去麼地道嘅Owl’s，我明喇！原來突登行過嚟，為嘅就係個靚仔店主！！！！

A姐見到靚仔店主，雙眼已經發哂光啦，問佢食咩佢都實話好食架啦！所以等我M佬試吓呢間2017年米芝蓮小食推介，名乎不乎實啦！

小店以貓頭鷹做logo，仲有唔少貓頭鷹嘅擺設，整個餐廳設計簡約，不過座位唔多，大概只可以坐到5個人，但就啱哂A姐啦，佢可以盡情睇住店主喺開放式廚房準備甜品。

呢度除咗設計簡約，連Menu選擇都唔多，不過，店主話重質不重量（我M佬都好認同）！呢度主打4款雪糕泡芙、Choux、8款定期轉換口味嘅Gelato同咖啡！款式唔多，但店主話每樣嘢都係佢自家手工製作，佢對每樣食品都充滿信心！

A姐已經流哂口水喇（因為店主定個泡芙？）！計我話，最重要當然係味道！

4個雪糕泡芙分別係Red Velvet、Praline Noir、Popcorn&Rocks同Mango Tango，每個賣相都唔錯，試吓先！

Mango Tango：橙色嘅泡芙，配上芒果雪葩、芒果熱情果醬同朱古力布朗尼
芒果嘅味道略帶微酸，又酸又甜咁，味道好清新。雪葩同芒果熱情果醬好match，泡芙又好脆口，食飽飯再食呢個都完全唔覺得膩，而且雪葩係店主親自製作，所以芒果肉好多，成份絕不馬虎！

Red Velvet：天鵝絨泡芙，配上雲尼拿杏仁雪糕、士多啤梨玫瑰醬同天鵝絨蛋糕
泡芙外脆內軟，配上細緻軟滑又有口感嘅雲呢拿杏仁雪糕，好好味呀！天鵝絨蛋糕嘅味道相對較淡，完全突顯到士多啤梨醬嘅味道，驚喜在於隱藏喺泡芙嘅粟米脆片，加入粟米脆片完全感受到店主為減低甜度嘅細心，而女仕們絕對可以當成一個午餐！

連我M佬都對呢間小店心心眼呀！雖然價值$58嘅泡芙，感覺好像有啲貴。但以Owl’s嘅食物全部人手細心製成，而且以咁大球gelato製成嘅泡芙，就絕對物超所值喇。

Owl’s Choux.Gelato.Coffee 
地址：尖沙咀麼地道32號地下
營業時間：12:00-23:00
電話：+852 2889 8227

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com