食自助餐最緊要係海鮮 紅磡都會海逸酒店Promenade
酒店嘅自助餐，喺唔同季節都有各種期間限定嘅主題，但講到最受歡迎嘅就梗係以海鮮為主題嘅自助餐啦！今個夏天，都會海逸酒店就以「仲夏海鮮夜市集」作主打，除咗生蠔、龍蝦等海鮮冷盤之外，仲有避風塘海鮮系列，及多款以水果入饌嘅菜式，夠晒開胃惹味。更值得大家注意嘅係，提前預訂可享高達6折優惠呀！
新鮮生蠔
食酒店自助餐，就梗係唔少得生蠔啦！都會海逸酒店嘅生蠔全部即叫即開，蠔身雖然細細隻，但勝在夠晒新鮮鮮甜，絕對值得encore再encore。
魚生刺身
就算赤海蝦大大隻，蝦肉鮮甜彈牙，都已經吸引唔到我。因為帆立貝勁厚身，大大隻，一啖擺落口嗰種鮮甜幸福感真係佔據我唔少胃部空間。
海鮮冷盤
另一個自助餐必須嘅項目，當然係海鮮冷盤啦！回本首推當然係龍蝦，預先開邊，食嘅時候夠晒方便。其他選擇仲有海蝦、長腳蟹腳、螺等。
避風塘炒辣麵包蟹
今次都會海逸酒店以「仲夏海鮮夜市集」為主題，除咗生蠔、魚生刺身、龍蝦等海鮮冷盤之外，仲有期間限定嘅避風塘海鮮等熱盤海鮮選擇。其中避風塘炒蟹鉗真係充滿大排檔風味，炒得非常香口又夠惹味，而且蟹鉗預先拆好，所以食嘅時候非常方便，話咁快又可以出去再encore！
剁椒魚雲
魚雲嘅鮮嫩加上剁椒嘅微辣香味，味道恰到好處。入口細嫩晶瑩，魚雲超級嫩滑，加上呢道菜極具功夫，所以值得瘋狂encore！
辣酒煮東風螺
螺肉非常彈牙，味道香辣，非常醒胃。其他嘅熱盤海鮮仲包括椒鹽瀨尿蝦、黃金蝦、金銀蒜蒸扇貝等，真係夠晒豐富。
煎鴨肝配洛神花汁
除咗海鮮之外，回本嘅選擇仲有鵝肝。鵝肝油香十足，非常香口，軟綿嘅鵝肝遇上香脆嘅多士形成強烈嘅對比，口感一流。至於酸酸甜甜嘅洛神花汁，更中和鵝肝嘅油膩感，錦上添花。
燴加州提子牛肋肉
除咗海鮮之外，都會海逸酒店自助餐，更以時令水果入饌的菜式，讓大家開胃消暑。呢個燴加州提子牛肋肉就深受我哋嘅喜愛，牛肋肉燴得好腍，醬汁香甜清新。
天婦羅
以水果入饌，唔通係水果天婦羅？非也！天婦羅有蠔同軟殼蟹兩款選擇，而醬汁則取以蘋果汁或熱情果汁，估唔到同醬汁同天婦羅咁夾。其他嘅水果入饌選擇仲包括蜜瓜凍湯、草莓醬汁烤豬排骨、香橙孜然香草燒春雞等，款款都非常清新，夠晒醒胃。
榴蓮系列
平時坊間唔少下午茶自助餐都以榴槤做主打，但估唔到都會海逸酒店嘅自助晚餐，同樣滿足埋呢個特別要求，咁大家就唔使俾錢分兩餐食啦！榴槤脆脆芝士餅卷、榴槤天使蛋糕等，呢個榴槤甜品上邊放上份量十足嘅榴槤肉，榴槤肉非常新鮮，而且無額外加工，鍾意食榴槤嘅我哋，真係非常滿足。
雪糕
雪糕選用Movenpick，除咗皇牌嘅瑞士朱古力之外，仲有5款唔同口味，梗係要全部試晒啦！
甜品
相信大家都知道，甜品係第二個胃，但都會海逸酒店自助餐嘅甜品選擇非常多，真係要多一個胃先夠！特別推介熱情果石榴奶凍、熱情果菠蘿撻、芒果金柚肉楊枝甘露，味道非常清新，為呢個自助晚餐畫上完美句號。
Promenade 西餐廳 Promenade Restaurant
地址：紅磡都會道7號都會海逸酒店7樓
電話：+852 3160 6880
營業時間：星期一至日 06:30 – 22:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
