[香港Staycation] 12間熱門酒店早餐大比拼 私心推介又係邊一間
酒店張床特別舒服，加上每次Staycation都會玩到好夜，所以第二朝好大機會敵不過睡魔，就算Staycation嘅package包埋自助早餐，你都可能選擇繼續瞓，瞓到check-out前最後一刻先肯起身，但就可能錯過咗一份好豐富嘅酒店打卡早餐喇！所以今日就同你分享12間熱門酒店嘅酒店早餐，睇吓究竟值唔值得瞓少啲嘆早餐啦！
12間熱門酒店早餐
1. 瑞吉酒店
2. 海景嘉福洲際酒店
3. The Hari Hong Kong
4. 萬麗海景酒店
5. 千禧新世界酒店
6. 馬哥孛羅香港酒店
7. The Pier
8. 沙田萬怡酒店
9. 灣仔諾富特世紀酒店
10. 金域假日酒店
11. 宜必思香港中上環酒店
12. 六國酒店
更多酒店優惠：Klook / Trip.com / KKday
瑞吉酒店 – The Drawing Room
瞓少啲都要食酒店早餐指數：🤤🤤🤤🤤🤤（5分為絕對唔可以錯過 ->1分為繼續瞓吧啦）
瑞吉酒店係香港最奢華嘅酒店之一，佢嘅早餐又點會令你失望呢！酒店早餐係半自助餐形式，主菜有多款選擇。但玩開Staycation嘅你，相信一講到瑞吉酒店嘅早餐，第一時間都會諗起鮑魚雞粥！鮑魚size都唔細，有成隻手指公咁長，煮得軟腍，仲有濃郁嘅鮑魚汁調味；至於雞肉鮮甜，粥底軟綿，可以自行添加葱花、大頭菜粒、薄脆同花生，呢碗粥絕對唔會令你失望。呢份中式早餐除咗粥，仲有點心拼盤：蝦餃、燒賣、珍珠雞同龍蝦春卷，特別鍾意龍蝦春卷，因為外皮超脆，蝦肉彈牙，口感豐富！至於自助餐區城都有唔少嘢食，包括：叉燒包、炒米粉、茄汁豆、炸饅頭、煙三文魚、火腿、沙律等等，而麵包嘅選擇都唔少，仲可以配上酒店自家製嘅多款新鮮果醬。如果你鍾意食水果，就一定覺得好驚喜，因為呢度有成8款選擇，夠晒新鮮！
入住詳情：[香港Staycation] 貼心管家服務 香港瑞吉酒店
海景嘉福洲際酒店 – 海景咖啡廊
瞓少啲都要食酒店早餐指數：🤤🤤🤤🤤🤤（5分為絕對唔可以錯過 ->1分為繼續瞓吧啦）
作為洲際集團現時喺香港最高級嘅酒店，海景嘉福洲際酒店嘅早餐同樣唔會令你失望！酒店早餐嘅自助餐區範圍非常大，仲可以透過玻璃睇到廚師備餐嘅情況，令空間感大增。必備嘅Egg Station原來一啲都唔簡單，因為用嚟整奄列嘅配料好多，可以自行搭配獨創嘅口味。此外，仲有麵檔、中式點心、腸仔、火腿、煙肉、果汁等等。總括嚟講，海景嘉福洲際酒店嘅早餐就以選擇多取勝。
入住詳情：[香港Staycation] 愛一個上威士忌課 海景嘉福洲際酒店
The Hari Hong Kong – Lucciola Restaurant & Bar
瞓少啲都要食酒店早餐指數：🤤🤤🤤🤤（5分為絕對唔可以錯過 ->1分為繼續瞓吧啦）
作為近年新開嘅酒店之一，The Hari嘅設計採冷酷英倫風，但服務就夠晒細心貼心。至於酒店早餐就以半自助形式，主菜每日都有6款以西式為主嘅選擇，所有主菜都係即叫即整。我哋分別揀咗可以拉絲嘅芝士火腿奄列，生熟度啱啱好，仲有蛋汁流心嘅效果；至於Egg Benedict配有煙三文魚，切開流心嘅蛋黃，真係好滿足呀！配菜除咗有沙律菜，仲有煙三文魚、牛油果、煙肉、腸仔、車厘茄等等，份量夠晒多呀！但自取區位置唔多，選擇略少，只有粟米片、生果、果汁、煙三文魚、火腿同麵包等。雖然自取區選擇唔多，但呢個主菜絕對值得你涯眼瞓試一試。
入住詳情：[香港Staycation] 英倫豪華酒店 灣仔The Hari Hong Kong
萬麗海景酒店 – Mirage Bar & Restaurant
瞓少啲都要食酒店早餐指數：🤤🤤🤤（5分為絕對唔可以錯過 ->1分為繼續瞓吧啦）
萬麗海景酒店因為鄰近會展，所以呢間酒店嘅房間數目係全港數一數二之多。但因為疫情令外國參展活動停頓，所以酒店不定期推出Staycation優惠以吸引香港人，亦令酒店嘅人流眾多，所以除咗check-in之外，早餐人流亦絕不少，真係要做好心理準備。而喺我哋入住嘅時候，酒店嘅自助餐以order任點任食形式，以減少人流聚集。order紙有煎蛋、奄列、腸仔、煙肉、茄汁豆、粥、燒賣、沙律等選擇，而我哋最推介係雞肉香菇粥，好好味呀！不過，上菜速度就肯定會比較慢同會有漏單情況發生。至於少部份嘅食物仍然喺自助餐區領取，包括麵包、果汁、水果、芝士同煙三文魚等。
入住詳情：[香港Staycation] 見證一個時代的浪漫 香港萬麗海景酒店
千禧新世界酒店 – Café East
瞓少啲都要食酒店早餐指數：🤤🤤🤤🤤🤤（5分為絕對唔可以錯過 ->1分為繼續瞓吧啦）
千禧新世界酒店嘅早餐係絕對絕對唔可以錯過，因為真係非常豐富呀！呢度嘅食物選擇非常多，有茄汁豆、腸仔、煙肉、火腿、水果、乳酪、沙律、果汁、egg station呢啲基本嘢當然唔少得，但麵檔竟然有沙嗲牛肉呀，朝早一碗沙嗲牛肉麵，相信係唔少人嘅習慣啊！至於中式選擇都有豬肉燒賣、珍珠雞、叉燒包、蘿蔔糕、腸粉同最鍾意嘅雞粥！另外，可能酒店前身係日航酒店，所以早餐仍保留唔少日式選擇，好似麵豉湯、奶油煎魚等等，絕對係一個Goodorning嘅早上。
入住詳情：[香港Staycation] CP值超高五星 千禧新世界酒店
馬哥孛羅香港酒店 – 咖啡廳
瞓少啲都要食酒店早餐指數：🤤（5分為絕對唔可以錯過 ->1分為繼續瞓吧啦）
作為老牌嘅五星酒店，馬哥孛羅香港酒店除咗房間舊之外，早餐都會令人好失望！餐廳嘅座位安排非常混亂，而且refill速度非常慢，甚至唔refill，好多吉盤；就算refill嘅，啲嘢食都係凍冰冰。至於蒸住嘅中式點心都唔夠熱，用料似係超市嘅叮叮點心貨色。但講到全份早餐最好味應該係Egg Station喇，所以每時每刻都大排長龍。整體嚟講，呢間酒店嘅早餐可以瞓到自然醒，先考慮落唔落去食啦！
入住詳情：[香港Staycation] 只有靚景嘅舊酒店 馬哥孛羅香港酒店
The Pier – WA-Theater Restaurant
瞓少啲都要食酒店早餐指數：🤤（5分為絕對唔可以錯過 ->1分為繼續瞓吧啦）
位於西貢嘅The Pier，未住就肯定非常期待，但住完就肯定非常失望。The Pier位於西貢白沙灣，因為擁有先天性嘅無敵海景，所以Staycation一啲都唔平㗎！不過，The Pier嘅服務、房間保養同衛生確實麻麻，至於早餐都會秉承失望嘅感覺。酒店聲稱早餐為半自助形式，但其實自取區就只有多士、茶同咖啡。至於主菜分為西式、日式同素菜三個選擇，我哋就揀咗西式同日式各一。可能係日本餐廳，所以佢個日式早餐相對好少少，配上無得輸嘅西京燒醬汁，真係好難會唔好味㗎！
入住詳情：[香港Staycation] 充滿度假feel 西貢白沙灣The Pier
沙田萬怡酒店 – MoMo Café
瞓少啲都要食酒店早餐指數：🤤🤤🤤🤤（5分為絕對唔可以錯過 ->1分為繼續瞓吧啦）
以4星酒店嘅價錢同質素，以價論價，真係無諗過沙田萬怡酒店嘅自助早餐會咁豐富！食物方面有中西式熱食、egg station、冷盤、即煮麵檔。麵檔除咗一般嘅丸同菜，連肥牛同雞肉都有，麵底仲有4款選擇。我特別欣賞佢個中式點心，選擇有香莤餃、珍珠雞、叉燒包、蘿蔔糕等等，至於粥方面，除咗白粥，仲有少見嘅菜乾排骨粥。此外，仲有早餐常客嘅茄汁豆、腸仔、煙肉、乳酪、沙律同果汁等等，驚喜連泡菜、枝豆、中華沙律、煙三文魚等等都有。
入住詳情：[香港Staycation] 迷人城門河馬場景 香港沙田萬怡酒店
灣仔諾富特世紀酒店 – Room Services
瞓少啲都要食酒店早餐指數：🤤🤤（5分為絕對唔可以錯過 ->1分為繼續瞓吧啦）
我哋一向都唔太鍾意喺房內用餐，因為成日覺得上到房嘅嘢食會變凍。但其實喺房內食早餐都有好處，就係可以瞓到早餐時般嘅最後一分鐘。早餐以西式為主，有牛角包、煙肉、火腿、腸仔、炒蛋、水果同果汁，份量唔算少。如果早餐習慣飲杯茶或咖啡嘅你，就要自己動動手，喺minibar自己沖喇！
入住詳情：[香港Staycation] 日本浴衣和牛之旅 灣仔諾富特世紀酒店
金域假日酒店 – Bistro on the Mile
瞓少啲都要食酒店早餐指數：🤤🤤🤤（5分為絕對唔可以錯過 ->1分為繼續瞓吧啦）
香港金域假日酒店嘅自助晚餐一向出名款式多，估唔到連自助早餐都唔例外。除咗egg station同麵檔，熱食嘅選擇都好多。當中大受歡迎嘅絕對係中式點心：有蝦餃、燒賣同珍珠雞，所以每次一出就會好快清晒，好在refill速度算快。但呢間酒店一嚟到weekend，早餐時段就會淪陷，想享受悠閒早餐嘅你，就未必適合喇！
入住詳情：[香港Staycation] 市中心出走輕度假 香港金域假日酒店
宜必思香港中上環酒店 – Room Services
瞓少啲都要食酒店早餐指數：🤤🤤（5分為絕對唔可以錯過 ->1分為繼續瞓吧啦）
喺房度食早餐，除咗可以瞓晏啲，有時因為靚景，你都會想留喺房間嘆早餐。今次入住嘅宜必思香港中上環酒店，望住維港西岸嘅九龍靚景，絕對係一個寫意嘅早上。早餐提供四個選擇，分別係三文治早餐、歐陸式早餐、美式早餐同中式早餐。特別一讚嘅係早餐供應時間至中午十二點，真係可以瞓到夠晒先至食個late breakfast。美式早餐有煙肉、炒蛋、茄汁焗豆、炸薯餅、雜錦香腸、蕃茄、乳酪、油醬多士同果汁；至於中式早餐就有菜乾排骨粥、豉油王炒麵、蒸豬肉蝦燒賣、蒸牛肉燒賣同果汁。兩份早餐都非常豐富，我哋特別鍾意個菜乾排骨粥，粥底軟綿，並帶有濃郁嘅菜乾香味！
入住詳情：[香港Staycation] 24小時食住玩兼有維港景打卡 平玩宜必思香港中上環酒店
六國酒店 – Room Services
瞓少啲都要食酒店早餐指數：🤤（5分為絕對唔可以錯過 ->1分為繼續瞓吧啦）
六國酒店嘅Staycation package選擇好多，但由於酒店無咩賣點，所以每個Staycation都係主打餐飲，午餐同晚餐絕對唔會令你失望。至於早餐就只可以話ok啦，唔係難食，但唔食亦都唔會可惜囉！前一晚將早餐選擇同送餐時間嘅落單紙掛喺門口，第二朝就熱辣辣送到嚟！我哋揀咗中式同美式早餐，中式有雞粥、餃子同炒麵，而美式就有煎蛋、腸仔、火腿、煙肉同麵包。
入住詳情：[香港Staycation] 驚喜打卡野餐 灣仔六國酒店
如果你哋都有Staycation酒店嘅早餐推介，記住話俾我哋知，等我哋可以同其他A姐M佬嘅字母粉開心share呀！
更多酒店優惠：Klook / Trip.com / KKday
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
