早茶勁多孖寶選 大埔京都大酒樓
飲早茶除咗要好食，仲要抵食，特別係做街坊生意嘅地區酒樓！大埔作為香港一個重要嘅住宿區，飲茶食點心嘅選擇真係好多，但京都大酒樓嘅平日早茶時段都要排隊入座，全因為早茶勁多孖寶選擇，自選嘅配搭真係啱食仲要慳唔少。
京都大酒樓
京都大酒樓：鮮蝦炸雲吞
京都大酒樓嘅鮮蝦炸雲吞大大粒，炸到金黃色，賣相唔錯。食落口感酥脆，原隻嘅蝦肉大大隻，彈牙又有鬆脆口感，配埋酸甜嘅醬汁，更加惹味。
京都大酒樓：原隻鮮蝦腸
孖寶揀腸粉當然就係抵食又明智！腸粉滑溜，皮又唔會太厚，加上原隻新鮮大蝦，簡單卻又考功夫。
京都大酒樓：醬皇蒸鳳爪
飲茶食點心又點少得鳳爪呢！鳳爪嘅醬汁香濃又入味，而且份量又多，抵食夾大件。
京都大酒樓：山竹牛肉球
有媒介票選山竹牛肉球為最不受歡迎點心第二位，我真係完全唔認同呀！京都大酒樓嘅山竹牛肉大大粒，肉味香濃仲帶有淡淡芫荽香。
京都大酒樓：鮮蝦菜苗餃
京都大酒樓逢星期一至星期六嘅早茶時段都有指定$1/隻嘅優惠推介，而鮮蝦菜苗餃亦係其中之一選。菜苖嘅香味十足，加上彈牙嘅大蝦，口感非常豐富。
京都大酒樓：京都蝦餃皇
蝦餃當然係每一間酒樓嘅代表！京都大酒樓嘅蝦餃大大隻，蝦嘅份量唔少，皮薄餡靚。
京都大酒樓：蠔皇鮮竹卷
一向都唔太鍾意食鮮竹卷，最怕佢啲醬汁杰撻撻。但京都大酒樓嘅蠔皇鮮竹卷有驚喜，醬汁唔會太糊口，但味道依然濃郁，腐竹索晒醬汁，非常口味。
京都大酒樓：香芋鴨腳扎
食鴨腳扎嘅重點從來都係塊芋頭！夾開腐竹，芋頭嘅香味隨之而來，口感綿滑。至於鴨腳大大隻，除咗本身鴨腳嘅香味，當然唔少得淡淡嘅香芋味啦！
京都大酒樓：走地滑雞粥
京都大酒樓嘅點心選擇非常多元化，連生滾粥都有呢！粥底綿滑，雞件多又滑，粥底亦充滿雞嘅鮮甜味，充滿幸福感。
京都大酒樓：上湯水餃皇
想食碟菜，除咗叫油菜之外，仲可以叫上湯水餃皇呀！6大隻自家手工包嘅水餃餡料十足，夠晒彈牙之餘，下面仲有一大份生菜，絕對係一個點心二種食法。
京都大酒樓：養顏紅棗糕
食點心好少叫甜品，但京都大酒樓都有唔少甜品選擇。帶有淡淡紅棗香嘅紅棗糕，非常清新，而且唔會太甜，加埋杯茶，真係傳統嘅經典。
京都大酒樓：基本資料
餐廳名稱：京都大酒樓 Capital Restaurant
地址：大埔安慈路4號昌運中心商場1樓2-11及14-33號舖
營業時間：星期一至日 07:00 – 23:30
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
