彩龍茶樓：大帽山隱世老字號的點心茶寮

平時食點心，都離不開去酒樓或點心專門店，有冇諗過可以喺山上邊嘅茶寮，望住一整片綠油油嘅山景，嘆滾水茶靚嘅一盅兩件呢？位於大帽山川龍嘅彩龍茶樓，開業超過40年，遠離市區所賣嘅唔係精緻細膩嘅點心，而係傳統嘅味道，親切嘅人情味，加上環境開揚，別有一番風味。

彩龍茶樓：香煎蘿蔔糕

煎嘢最緊要係煎完即刻食！彩龍茶樓負責煎嘢嘅婆婆，快手又純熟，煎到香噴噴，食落外層鬆化，內層軟綿綿嘅蘿蔔口感，沾上必點嘅甜醬，十分滋味！

彩龍茶樓：牛柏葉

彩龍茶樓嘅牛柏葉無大量嘅配菜墊底，所以牛柏葉嘅份量非常多，食極都有，非常抵食。牛柏葉嘅滑嫩彈牙，索晒醬汁，非常惹味。

彩龍茶樓：蝦餃

彩龍茶樓嘅蝦餃新鮮出籠，已經贏在起跑線。估唔到蝦餃皮都夠晒薄，可以若隱若現見到裏面嘅蝦肉。蝦肉味道鮮甜，夠晒彈牙。

彩龍茶樓：鳳爪

鳳爪非常入味，大細啱啱好，食得方便，又唔會太細隻，啜得唔夠爽快。彩龍茶樓嘅鳳爪豉汁味道滿瀉，夠腍又唔會油淋淋。

彩龍茶樓：鵪鶉蛋燒賣

講到彩龍茶樓嘅懷舊點心又點少得鵪鶉蛋燒賣呢！用上薄身嘅燒賣皮，令鵪鶉蛋同燒賣連為一體。鵪鶉蛋外層一咬即脆，口感彈牙，將入面嘅蛋黃連埋肥美嘅豬肉一齊食，肉香同蛋黃香嘅吸引力互相輝映！

彩龍茶樓：叉燒包

雪白嘅叉燒包外皮，裏面係沾滿醬汁嘅叉燒餡，叉燒甜而不膩，餡料豐富，包皮鬆軟而不黏，係彩龍茶樓必食嘅推介。

彩龍茶樓：基本資料

餐廳名稱：彩龍茶樓 Choi Lung Restaurant
地址：荃灣荃錦公路2號川龍村地舖

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com