越餃越刁鑽 太子餃掂手工餃子雲吞專門店
細個認識嘅水餃，餡料嚟嚟去去都係嗰啲，但原來時代嘅巨輪，令水餃都進步咗唔少，配料嘅選擇越嚟越多，極具創意，令食物感覺到新意呢！位於太子嘅餃掂手工餃子雲吞專門店，餃子由人手包製，選擇多達十數款，更有素食嘅選擇，加上餐廳嘅不添加味精同無加鹽嘅湯底，更加係健康又不失好味嘅選擇。
叫完嘢食，店員極力推薦我哋試吓枱上面嘅醃蘿蔔，連一向唔鍾意酸嘅我都覺得好好味，夠晒開胃！另外，仲有2款自家秘製醬汁，香辣醬同四川麻辣醬，辣味濃郁又夠香，用嚟配麵或餃子都一流！
狀元九鼎湯
呢度只要你叫湯餃，湯底就一定會係狀元九鼎湯，九鼎湯由粉葛、順德活鯪魚、香山活鰂魚、紅蘿蔔、扁豆、赤小豆、新會陳皮、蜜棗、鮮排骨等煲成，因為不添加味精同無加鹽，所以味道好清淡，但絕對有益，如果怕淡就惟有自己落鹽啦！
至尊松茸豬肉餃
呢間舖頭除咗湯底健康，水餃都係以瘦肉為主，調味唔濃，主要係靠松茸帶出豬肉味，加上皮薄，絕對係鎮店之寶！叫至尊松茸豬肉餃仲會送狀元九鼎湯，真係食完都唔口渴。
韮菜豬肉餃
餡料超新鮮，豬肉同韮菜真係perfect match，只係略嫌肉汁唔夠多。
重慶鮮肉雲吞
雲吞皮滑嘟嘟，一口一隻仲好彈牙！我哋叫咗碗中辣，如果想食辣就記住叫大辣挑戰一下喇。
中山「金叱」蒸餃子
金叱由秘製不見天豬肉、南乳等材料製成，不過，蒸餃子皮比較厚，如果好似A姐咁鍾意食南乳就一定要食，如果唔係嘅，就不必啦。
松茸腐皮卷
腐皮卷包住木耳、甘筍、松茸，係一個全素嘅健康選擇，絕對係食得健康。
