尖沙咀喜來稀肉Seorae 令人回味無窮嘅護心肉同牛五花

終於涼涼哋，有少少秋意，最啱食韓燒啦!! 今次終於dig起心肝去排隊等喜來稀肉 (Seorae)，點知好好彩只係等咗3張枱，就有位喇 (可能係因為平日加上嗰陣只係六點幾) ！

食韓國嘢最正就係韓國前菜，呢到有泡菜、新鮮洋蔥同芽菜。另外，有人會幫你用鐵板外圍嘅位置“燒”蛋，有泡菜同原味兩款。我就鐘意泡菜味多啲，香口啲吖嘛。大家記住留意火喉，時間一耐就會老㗎啦!

嚟到呢到梗係要嗌喜來稀肉，薄薄一塊，卷到好似朵花咁，賣相就好吸引啦。食落又真係幾正，肉質又嫩又多汁，包埋生菜，一個字: 掂! 不過大家要注意唔好燒太耐，因為好薄好易熟，燒一分鐘okay㗎啦，如果唔係會燒晒啲肉汁。

人哋話喜來稀肉嘅護心肉都一定要試，有辣有唔辣。護心肉原來係豬橫膈膜同豬肝之間嘅肉，每隻豬得200至300克，非常矜貴。我哋就梗係揀辣味啦，不過其實都唔係好辣，燒起嚟就好香!! 入口有啲豬肝味，脂肪唔多。相比起喜來稀肉，護心肉比較較厚身，食落較爽口。講真，第一次食呢個部位，幾特別。

另外，我哋叫咗牛五花，又係薄薄一塊，輕輕一烤就根本已經熟晒，肉質幼嫩，加埋啲脂肪，好香好惹味。

豬皮，車仔麵就食得多，乜原來可以韓燒嘅咩? 豬皮本身就已經熟，所以燒一陣就得。不過我覺得食落有啲硬，有幾舊仲勁難先咬得開，唔係好啱我哋!!

除左烤肉之外，M佬仲想試石窩飯、水冷麵同炒年糕，但係因為我哋食燒肉已經好飽，要等下次先有得試。

臨走前記得喺Reception拎埋香口糖，清一清啲肉味。甜甜的，味道好香，有啲薄荷味。

總括嚟講，喜來稀肉同護心肉都值得試。另外，欣賞餐廳環境闊落，卡位都好好坐，因為之前去嘅韓燒店都好窄。

喜來稀肉 (Seorae)
地址：尖沙咀金巴利道79-81號金栢閣1樓連地下
營業時間：星期一至六 17:00-04:00；星期日 17:00- 00:00
電話：+852 2723 6692

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！