【倫敦點心放題2026】咁係因為你悲觀，我睇到新鮮出籠帶嚟嘅好處！倫敦梁山好漢任食點心
好多人都話放題嘅出品一定麻麻，又認為唐人街嘅中餐係做遊客生意，咁係因為你悲觀，我睇到新鮮出籠帶嚟嘅好處！位於唐人街嘅梁山好漢，係一間台灣餐廳，而梁山好漢除咗招牌嘅小籠包之外，近期更推出人氣極高嘅任食點心，90分鐘任食超過40款嘅點心，我哋食完之後，都覺得梁山好漢任食點心非常抵食，而且梁山好漢點心出品非常高質，值得推介！
蟹粉小籠包
小籠包係梁山好漢嘅招牌，如果食點心放題，多達6款唔同口味嘅小籠包無限任食呢！而我哋最鍾意就係蟹粉小籠包，湯汁豐富，帶有香濃嘅蟹粉鮮甜味，鮮甜無比，齒頰留香。
梁山蝦餃皇
食點心又點少得蝦餃呢！梁山蝦餃皇嘅皮勁薄，至於入面勁足料，蝦嘅份量多而且新鮮彈牙，絕對係驚喜之作。
蟹子燒賣皇
燒賣一向係我的最愛！豬肉同蝦嘅比例啱啱好，令蟹子燒賣皇除咗爽口彈牙之外，更加添了豐富嘅肉汁，極具滿足感！
蝦肉燕餃
梁山好漢嘅點心以精緻嘅餃類為主，絕對考師傅嘅功架！蝦肉燕餃相對梁山蝦餃皇皮更薄，晶瑩剔透，蝦肉同樣十足，新鮮彈牙。
迷你珍珠雞
梁山好漢嘅任食點心選擇超過40款，整體嘅出品唔錯，但始終有啲點心可以直接pass，其中包括迷你珍珠雞。迷你珍珠雞嘅糯米帶有淡淡嘅荷香味，本應期待十足，但糯米內嘅配料，只有薄薄嘅肉碎，略為失望。
臘味蘿蔔糕
梁山好漢嘅任食點心雖然限時90分鐘，但上菜速度絕對唔慢，大胃王嘅你絕對食得夠晒滿足！呢個臘味蘿蔔糕即叫即煎，煎到微燶，加添香脆焦香嘅感覺！雖然蘿蔔比例唔多，但反而更似香港嘅茶樓點心出品，我就非常滿意。
鮮蝦腐皮卷
必點推介！鮮蝦腐皮卷即叫即炸，腐皮炸到非常香脆，入面有勁多大大隻嘅蝦，新鮮又足料，口感非常豐富，極具層次。
梁山好漢 Leongs Legend
地址：39 Gerrard St, London W1D 5QD
電話：+44 020 7434 0899
營業時間：星期一至星期六 12:00-23:00、星期日 12:00-22:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
