來一趟時空旅行 紐卡素Beamish Museum

相信每個人都幻想過坐上時光機，穿越時空，回到過去，但原來想回到過去，都唔係天方夜譚！位於紐卡素嘅比米什博物館（Beamish Museum），就有別於一般擺滿文物、古蹟等展品嘅博物館，館方將18世紀末到20世紀中嘅英格蘭建築同內部擺設以原比例還原，仲可以坐上當時嘅電車同蒸氣火車，啱晒大家打卡，但最吸引我哋嘅係呢樣嘢……

Beamish Museum | 簡介

英國有唔同主題嘅博物館，而Beamish Museum就係一所展示18世紀末到20世紀中，以英格蘭為主題嘅露天博物館，將建築、裝飾擺設、市民生活等以原比例還原。Beamish Museum內設有多個區域：1900年代嘅市鎮街道、1913年嘅煤礦村落、1950年代嘅屋苑居所等，參觀時更可以乘坐蒸汽火車、雙層電車同英倫巴士，甚至去舊式理髮店剪頭髮、去商店買兒時玩具、去烘焙店買麵包，讓你沉浸於昔日嘅時空，並成為英國最具代表性嘅歷史主題博物館之一。

Beamish Museum | 分區介紹

Beamish Museum | 1900s Town

踏進1900年代嘅英格蘭城市嘅市中心，中心街道兩旁設有銀行、牙醫診所、餐廳、酒吧、報社、麵包店同雜貨舖等，重點係全部都可以入去參觀，讓你親身走進歷史！每當雙層電車駛過1900s Town嘅時候，呢度就會成為Beamish Museum最熱門嘅打卡景點，記住ready相機呀！

Beamish Museum | 1900s Pit Village

起源於英國嘅工業革命，工業化後，令煤礦嘅資源需求急速上升，而礦工更成為當時勞工階層嘅主要工作。喺1900s Pit Village就可以睇到當時嘅礦井、學校、教堂、住所等建築，而喺礦井前，更設有油燈店，可以感受一下當時工人冒住生命危險去開礦。

Beamish Museum | 1940s Farm

二戰後嘅英國，全國進入休養生息嘅階段；加上當時糧食短缺，所以喺1940s Farm就可以參觀當年嘅農場同牧場，了解市民自給自足嘅生活。農場仲飼養咗唔少動物，成為Beamish Museum最受小朋友歡迎嘅區域。

Beamish Museum | 1950s Welfare Hall & Town

嚟到1950s Welfare Hall & Town，城市發現開始現代化，社區會堂、劇院、商店、咖啡室、警察局同住宅區等，重點係全部都可以入去參觀，更可以到住宅區內嘅居所，坐喺1950年代風格嘅客廳，睇返當年嘅電視節目。另外，商店街內的電器店同玩具店更充滿驚喜，不妨花啲時間，尋找一吓心頭好。

Beamish Museum | Transport System

Beamish Museum 唔單止展示歷史建築，佢哋嘅交通系統都係重點之一。全館設有運行中嘅雙層電車、英倫巴士、蒸汽火車，遊客可以隨時搭乘，感受當時英國人嘅出行方式。

Beamish Museum | 遊玩攻略

Beamish Museum | 建議提早到場

Beamish Museum佔地超過300英畝，玩足一日都未必睇得晒，所以建議一早就到場。

Beamish Museum | 雙層電車

建議一入場就乘坐雙層電車或英倫巴士，可以環繞整個Beamish Museum一圈，喺唔同嘅區域都設有中途站，而一圈車程約20分鐘，建議坐晒成個圈先，咁可以對整個Beamish Museum有初步認識。

Beamish Museum同香港歷史博物館嘅香港故事相似，但除咗規模更大之外，最吸引我哋嘅係博物館嘅職員會化身當年嘅居民、銀行職員、店舖老闆等，仲有唔同嘅表演節目，讓你嘅投入感提升，真係好似穿越時空，回到過去！

比米什博物館 Beamish Museum
地址：Stanley DH9 0RG 英國
營業時間：星期一至星期日 10:00-17:00
門票（全年有效）：￡33（成人）、￡25（學生及長者）、￡20（5至16歲小童），另設有家庭套票￡55起
網址：www.beamish.org.uk

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com