強勢回歸！喇沙過江龍 倫敦小娘惹
以前喺鰂魚涌返工，小娘惹係我哋成班同事嘅飯堂，午餐嘆喇沙、海南雞飯、肉骨茶，仲滿載我哋成班同事講是講非嘅回憶。直至有一日，香港變了，小娘惹離開了，失去嘅當然唔止一份熟悉嘅味道。直至小娘惹喺倫敦嘅Sutton重開，失而復得嘅美食，味道依舊，一打門就聞到熟悉嘅喇沙香味同獨特嘅情懷。
倫敦小娘惹
倫敦小娘惹嘅店面面積大概只有15個座位，大家去嘅時候，要有排隊嘅心理準備。另外，門外如果有一條排隊嘅人龍，記得要先入鋪頭攞飛再排隊呀！我哋就係無攞飛，以為直接排隊，搞到等耐咗，好彩想食嘅嘢未賣晒咋。仲有，倫敦小娘惹只收現金，大家記住帶夠錢去找數呀！
招牌娘惹海蝦喇沙
餐牌嘅選擇比以前少，但貴精不貴多，以前鰂魚涌小娘惹嘅招牌娘惹海蝦喇沙，嚟到倫敦都依然神還原！喇沙湯底非常濃郁，微辣帶有椰香味，真係可以清晒碗湯呢！至於麵底當然係喇沙常見嘅摻摻，即係一幼一厚嘅米粉同福建麵，增加口感之餘，仲要勁掛湯。配料方面，有海蝦、魚片、雞蛋、豆卜等，要知道魚片係英國唔易搵，所以真係好矜貴呀！不過，老闆娘話獅蚶喺英國真係搵唔到貨源，所以倫敦小娘惹嘅招牌娘惹海蝦喇沙帶有少少遺憾，但計我話，呢碗招牌娘惹海蝦喇沙已經係全英國最好味嘅喇沙！
自家製腐皮魚肉春卷、深海魚蛋喇沙
深海魚蛋喇沙以前香港都有，但嚟到倫敦小娘惹，老闆就加入自家製腐皮魚肉春卷，絕對係倫敦小娘惹嘅必食推介呀！自家製腐皮魚肉春卷勁厚身，外皮香脆又夠熱辣辣，肉質非常彈牙，口感一流！至於呢碗喇沙大大碗，配料非常豐富，仲有同樣彈牙嘅深海魚蛋、雞蛋、豆卜等等。而如果你試過都鍾意佢嘅自家製腐皮魚肉春卷，可以額外再點春卷做小食，因為隨喇沙只有兩條春卷，確實唔夠喉啊！
小娘惹 Little Nyonya
地址：Westmead Rd, Sutton SM1 4HY
營業時間：星期一、星期三至星期日 11:30–15:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
