ATTO：勁癲！低至£14任食韓式美食及韓燒
由倫敦出發，最快40分鐘就去到Guildford（吉爾福德），非常適合作為倫敦近郊一日遊嘅目的地。嚟到Guildford市中心當然要先醫肚，見到呢間ATTO Korean BBQ & Buffet Restaurant，低至£14就可以任食超過80種嘅韓式美食及韓燒，真係勁癲，完全係抗通漲嘅糧尾救星！但原來除咗韓式美食及韓燒之外，仲有五款隱藏嘅美食？
ATTO Korean BBQ & Buffet Restaurant
ATTO：韓式炸醬麵
韓式炸醬麵當然係韓國菜嘅代表！ATTO用上粗身嘅麵條，所以掛滿濃郁炸醬醬汁，入口帶住微甜鹹香嘅醬汁味道。最鍾意係麵條較粗，煙韌又有口感。
ATTO：辣炒年糕
講到韓國街頭小食，又點少得辣炒年糕！煙韌嘅韓式年糕配上濃郁辣醬，口感豐富之餘，辣醬帶住甜辣味，食落特別過癮。鍾意食辣嘅朋友可以試吓，一邊食韓燒一邊食辣炒年糕，韓味十足。
ATTO：石頭飯
任食放題食石頭飯？ATTO特意製作迷你版嘅石頭飯，等你唔會太飽之餘，又可以滿足一下想要有飯氣嘅你。石頭飯有四款口味選擇，熱辣辣嘅石頭飯一上枱已經聞到陣陣香氣，飯粒放喺滾熱嘅石鍋入面，食之前拌勻牛肉、蔬菜、飯及韓式辣醬，令醬汁均勻包住每粒飯，既有口感又有層次。而石鍋底部仲會形成一層香脆嘅飯焦，非常驚喜。
ATTO：韓式炸熱狗
ATTO Korean BBQ & Buffet Restaurant嘅韓食選擇都幾多元化，就連睇韓劇成日出現嘅韓式炸雞同韓式炸熱狗都有呢！Corn Dog外表金黃香脆，炸漿包住雞肉腸，一口咬落外脆內軟，非常香口。
ATTO：韓式燉牛肋骨
必食呢個ATTO嘅韓式燉牛肋骨！牛肋骨炆煮至軟腍入味，肉質嫩滑之餘，亦吸收咗湯汁嘅香甜味，而且牛肉味非常香濃，絕對係回本之選。
ATTO：韓式牛肋骨湯
食韓國菜，枱面又點少得一碗韓式熱湯呢！ATTO嘅韓式牛肋骨湯同樣軟腍入味，湯底帶住濃郁牛肉香，啖啖湯都非常清甜！而且食完炸雞、Corn Dog等較乾身嘅食物之後，用一碗熱辣辣嘅牛肋骨湯中和返，真係絕配。
ATTO：韓燒
韓燒嘅食物自取，有牛仔骨、醃製牛肋骨、五花腩、兩款醃製雞肉、魷魚鬚等，選擇一啲都唔少，充滿驚喜。其中五花肉油脂豐富，燒到表面微微焦香後，配生菜包住一齊食，可以減輕油膩感，亦加添清新嘅感覺；至於醃製牛肋骨，肉香濃郁，特別惹味，絕對係ATTO嘅encore之選。
ATTO：卷物
喺ATTO嘅餐牌以外，仲有五款壽司卷物，全部即叫即做確保新鮮，成為隱藏嘅美食。我哋特別鍾意炸蝦卷，蝦肉大大隻，新鮮即炸，所以非常香脆，口感一流！
ATTO：基本資料
餐廳名稱：ATTO Korean BBQ & Buffet Restaurant
地址：15-17 Swan Ln, Guildford GU1 4EQ
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
