倫敦Colindale好住嗎？一文睇清生活配套、交通、校網、租金及樓盤等全攻略

移民英國嘅第一件事，當然要處理住屋問題啦，如果打算以倫敦作為落腳點，住邊區比較好呢？位於倫敦北面嘅Colindale，係唔少港人嘅聚居地，我哋亦喺Colindale住咗1年以上，而作為居民嘅我哋，以親身嘅角度，由交通、生活配套、治安、校網、租金、樓盤資料等各方面分享，究竟倫敦Colindale好住嗎？

Colindale | 交通配套

地鐵

Colindale係倫敦地鐵Northern Line嘅其中一個中途站，屬於收費區Zone 4。前往倫敦市中心（Zone 1）嘅交通非常方便，唔洗轉車就可以去到King’s Cross St. Pancras地鐵站（23分鐘）、去唐人街嘅Leicester Square地鐵站（27分鐘）。但最正嘅係Northern Line逢星期五同星期六嘅夜晚，提供通宵列車服務，玩夜咗或去機場坐早機夜機，都夠晒方便。

巴士

除咗地鐵之外，Colindale亦有直達倫敦市中心（Zone 1）嘅巴士。由Colindale出發，去到終點站Marble Arch，車程約需46分鐘，勝在比地鐵價錢平同唔洗轉車。另外，每日亦有通宵巴士往返倫敦市中心同Colindale。

Colindale | 生活配套

亞洲超級市場

Colindale有小香港，甚至有新唐人街之稱，而所屬嘅Barnet市鎮亦係英國最多華人居住嘅社區之一。由Colindale地鐵站行10分鐘左右，就會去到龍鳳行超級市場，龍鳳行係英國四大華超之一，售賣唔少亞洲食材、港式調味料，甚至連肉檔、魚檔都有，非常齊全。另外，喺Colindale嘅一個大型樓盤Beaufort Park內，亦有一間迷你嘅日本超級市場：conveni Tokyo，呢間日本超級市場售賣唔少日本調味料、亞洲食材，甚至有一個壽司Corner，可以食到新鮮嘅魚生飯、壽司、刺身同關東煮。

港式餐廳

如果唔想煮，喺龍鳳行超級市場旁邊就有一座超過20間亞洲餐廳嘅Food Court（Bang Bang Oriental Foodhall），不過，基於政治考量，其實我哋就唔太建議喇！另外，位於Colindale嘅一個大型樓盤Beaufort Park內，亦有港式點心店（JM Oriental Kitchen & Dim Sum），味道唔錯，而且出品精緻，放假好多人會特登揸車嚟嘆點心。

超級市場 / 日用品店

如果唔想刻意追求港式，Colindale嘅英國超級市場同日用品店選擇都好多，由Colindale地鐵站行10分鐘左右，就會去到大型嘅英國超級市場同日用品店：Aldi、Asda、B&M、Morrisions、馬莎等，想買嘅嘢一應俱全！如果唔想行咁遠，其實每個屋苑都有細啲啲嘅超級市場，例如：Co-Op、Sainsbury Local、Tesco Express，啱晒放工返嚟，就可以即刻補給啦！
詳情：一文睇清10大英國超市比較、價位、特色、會員、禮品卡攻略

西式餐廳

咁如果唔想煮，附近又有無咩餐廳選擇呢？以一個小社區嚟講，其實Colindale嘅餐廳選擇真係好多，例如有KFC、McDonald’s、Morrisons Cafe、Nando’s、Subway、Wetherspoon，漢堡包店ITJL同英式茶餐廳Cafe Anglais等等。

其他設施

除咗超級市場同餐廳之外，Colindale嘅綠化比例都算高，地鐵站對面就有一個社區公園。而且區內更設有圖書館，雖然館藏唔算太多，但都有少量嘅中文藏書。另外，Colindale亦有一座非常大型，有關英國皇家空軍嘅博物館：Royal Air Force Museum London，大家放假可以去博物館慢活一吓！

Colindale | 治安

Colindale係一個住宅區，居民中除咗本地人，就以華人同亞洲人為主。另外，Colindale設有一個大型紀錄部隊訓練基地，所以喺英國其中一個治安良好嘅社區。

Colindale | 校網

Colindale之所以深受香港人喜愛，唔通真係為咗多超級市場咩？Colindale所屬嘅Barnet係倫敦傳統名牌校網區，有超過30間榮獲OFSTED評定為Outstanding及Good嘅名牌中小學，例如Canons High School、Haberdashers’ Aske’s School、Hendon School、Henrietta Barnett School、Orion Primary School、Queen Elizabeth’s School、St Michael’s Catholic Grammar School、The Hyde School等，成為唔少家長心儀嘅住區。

Colindale | 缺點

附近無銀行

雖然話依家多數人使用網上理財，但總有需要去銀行嘅時候，但成個Colindale只得幾部櫃員機，想去銀行入錢或辦理其他銀行手續，就必須去市中心喇！

太多香港人

如果啱啱喺香港移民過嚟，要適應嘅嘢實在太多，所以初到埗揀Colindale生活，見口見面都係香港人，相對會比較快習慣英國嘅生活。但Colindale確實有太多香港人，如果你想有外國生活嘅感覺，Colindale絕對唔足唔到你；另外，香港人嘅社區就特別多是非，相信你都聽唔少所謂香港人幫香港人嘅故事。不過，我都載番頭盔先，我哋都遇過好嘅香港人鄰居。

交通配套

前面先講咗由Colindale前往倫敦市中心（Zone 1）嘅交通非常方便，點解又會係缺點呢？因為Colindale出入市區主要依靠倫敦地鐵嘅Northern Line，但當遇著地鐵罷工或Northern Line故障（要知道有百年歷史嘅倫敦地鐵係成日故障），就等於無辦法出入市區，而巴士嘅班次亦唔頻密，令Colindale成為一個孤島。

生活配套

Colindale嘅超級市場選擇好多，但就無藥妝店，如Boots、Superdrug等。但或者呢個都唔算一個好大問題，因為購買日用品仲可以選擇超級市場。

Colindale | 租金

英國近年嘅租務市場升幅驚人，以我哋一房租盤（約500呎）為例，喺2021年嘅每月租金低於￡1,000；到2022年升幅至少達37%，至我哋嘅每月租金為￡1,370，直至住咗一年後傾續約，業主要求每個月再加接近10%至￡1,500；而2026年Colindale嘅一房租盤已升至￡1,700。當然，呢個價錢只係俾大家參考，始終每個單位都唔同，有無包傢私、單位樓層同方向等等，都係租金嘅因素。

Colindale | 樓盤資料

Colindale主要有三大樓盤，分別係Beaufort Park、Colindale Gardens同Pulse等。其中Beaufort Park同Colindale Gardens仍然有唔少新嘅住宅落成，所以仍提供唔少一手樓盤嘅選擇。不過，由於我哋唔係物業代理，亦只係從Colindale居民嘅角度分享Colindale嘅住後感，加上我哋覺得無論租定買，都要自己親身嚟到感受，先知道自己鍾唔鍾意呢個地區，如果大家有興趣嘅話，可以睇以下樓盤嘅官方網站再作研究。

Beaufort Park

Beaufort Park會所設有室內泳池、按摩池、健身室、桑拿及蒸汽浴室等設施，而管理費亦已包括水費在內（F座打後之新建樓盤除外），所以對租客嚟講，即係免繳水費！

Colindale Gardens

Colindale Gardens較近地鐵站，會所設有健身室、桑拿浴室等設施。

利申：我哋已經搬離Colindale，向第二個住宅區出發！如果你哋對於倫敦邊個地區有興趣，都可以經以下途徑聯絡我哋，我哋再分享我哋對該區嘅觀感啦！

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

英國倫敦住邊區好？倫敦Colindale

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary 
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com