Hotori：倫敦看得見的炭火即叫即燒居酒屋

用炭火烹調，一絲絲嘅炊煙與香味，成為倫敦Hotori嘅靈魂！位於Holborn嘅Hotori，係一間主打串燒同魚生等和食，係倫敦相對少見嘅居酒屋呢！我哋建議坐喺吧枱前，睇住一串又一串嘅串燒放上炭爐，感受炭火嘅煙火氣，非常治癒；不妨叫多杯清酒或店長特調雞尾酒，讓自己喺微醺之中享受美食。

Hotori

Hotori Holborn有多款套餐，抵食之餘又絕絕不馬虎，加上擺盤精美，一於相機食先！前菜嘅番茄鮮甜多汁，加上清爽醬汁，酸甜開胃，非常清新；魚生炙燒後更迫出魚油嘅香氣，油香豐盈，入口鮮甜，極具層次；前菜仲有玉子，簡單卻感受到Hotori嘅誠意。

Hotori嘅重點當然係佢哋即叫即燒嘅串燒啦！套餐嘅串燒由Hotori嘅廚師發板，串串都有淡淡嘅炭火香，非常驚喜！雞翼燒到皮脆肉嫩，咬開非常juicy；至於雞髀肉嘅肉質更嫩滑，加上少少七味粉吊味就更惹味；講到最驚喜就係雞柳，食落唔會乾身而且又唔會嚡熠熠，證明火喉控制得啱啱好。

所有壽司同刺身都由充滿經驗嘅日藉師傅主理，全部壽司即場手握，充滿誠意！呢個拼盤有齊刺身、握壽司同炸蝦天婦羅卷，食材全部都用料新鮮，夠晒高質。

有一整隻軟殼蟹呀！軟殼蟹仲有唔少膏，肉質鮮甜，加上炸漿輕薄香脆，夠晒香口。仲有大蝦同時令蔬菜嘅天婦羅，口感層滿層次，加上Hotori嘅擺盤一流，色香味俱全。

餐廳名稱：Hotori Holborn
地址：1 New Fetter Ln, London EC4A 1AN

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！