【英國自助餐】正日生日免費！英國超豐富自助餐JRC Global Buffet

無論身處世界各地，生日就梗係要慶祝啦！講到食生日飯，自助餐確實係一個唔錯嘅選擇。位於英國嘅連鎖自助餐餐廳JRC Global Buffet，以食物選擇豐富作賣點，中、西、日、印，海鮮同甜品等等，應有盡有，而且壽星正日生日仲係免費添架！

JRC Global Buffet | 生日優惠
JRC Global Buffet設有6間分店，除咗一間位於威爾斯嘅卡地夫之外，其餘5間分店都位於倫敦，而各間餐廳喺唔同時段嘅收費都有些微分別。至於壽星喺正日生日，連同一位正價付款嘅成人，壽星本人即可獲得免費自助餐優惠。換句話說，最抵就梗係2個人去，變相半價啦！想食嘅話，記住24小時前網上預約，而到達餐廳時需出示身份證明文件，以作生日之證明。

JRC Global Buffet | 海鮮
英國係美食沙漠，所以戴番頭盔先，JRC Global Buffet只係食物選擇多，並唔係以好好好好食作賣點，所以大家千祈唔好期望太高，加上高質從來都唔係同自助餐掛鈎架啦！食自助餐，香港人最愛嘅海鮮，JRC Global Buffet都有！冰鎮海鮮有蝦、青口、蟹同扇貝等，呢啲冰鎮海鮮其實雪到無咩味，所以大家試吓就可以skip。

JRC Global Buffet | 壽司
除咗海鮮，刺身同壽司應該係平時香港人另一關注嘅重點。呢度嘅壽司以小卷為主，炸蝦卷、三文魚牛油果卷、腐皮壽司等，共有6款選擇，味道方面同樣唔會有驚艷感覺；至於所謂嘅刺身就只有熟蝦；反而推介嘅係啲日式小食，有泡菜、中華沙律同日式海蜇，由於我係超鍾意食中華沙律，所以我係無限encore。

JRC Global Buffet | 鐵板燒
喺JRC Global Buffet成日出現嘅人龍，就係嚟自鐵板燒。鐵板燒即叫即燒，有4款食物選擇，至於師傅絕對唔係日本人。至於魷魚係我哋嘅推薦，如果你鍾意食全熟牛扒，就一定唔可以錯過。

JRC Global Buffet | 中菜區
講到JRC Global Buffet嘅驚喜，集中喺中菜區。點心有5至6款，雖然大部份都係蒸包，但都有我最鍾意嘅燒賣。其他好食推介仲有口水雞、燒鴨！另外，餐廳仲有10幾款中式小菜同炒粉麵飯，味道正正常常。不過，佢個片皮鴨同好多英國餐廳一樣，係碎上，同我哋食開嘅風格有啲出入。

JRC Global Buffet | 西餐區
西餐區可以再細分為唔同國家嘅菜式，不過，擁有亞洲胃嘅我哋，就無刻意細意劃分。食物有Pizza、肉醬意粉、英式烤肉、巴西燒烤、炸物等等。推介新鮮出爐嘅炸雞翼，真係外脆內嫩；至於巴西燒烤嘅雞翼同樣夠晒入味，值得推介。

JRC Global Buffet | 印度咖哩
英國嘅印度人比例好多，所以印度咖哩嘅選擇超多！不過，我哋唔太懂得欣賞印度菜，你哋試完再話我知啦！

JRC Global Buffet | 甜品
甜品嘅選擇同樣超多，蛋糕、雪糕、水果、朱古力噴泉等等。

JRC Global Buffet | 飲品
除咗水之外，飲品係要額外收費。JRC Global Buffet提供免費任飲嘅汽水plan，我哋每次都會叫埋。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

JRC Global Buffet
網址：www.jrc-globalbuffet.com
（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com