潮牛潮汕牛肉火鍋：在倫敦吹起一股潮汕風

香港人鍾意打邊爐，特別係旅居英國後，更喜歡圍爐取暖。喺倫敦嘅火鍋店，一向以四川火鍋作主導，但近排吹起一股潮汕風，多咗好多潮汕火鍋選擇，就連遠離唐人街嘅Aldgate都有。呢間潮牛潮汕牛肉火鍋嘅牛肉款式多，自助吧仲有任食支豆同西瓜呢！

潮牛潮汕牛肉火鍋

食潮汕火鍋最重要嘅係個沙茶醬，所以唔少人都會選擇相對清淡嘅清湯或牛骨湯，再用醬料作調味。不過，潮牛潮汕牛肉火鍋嘅湯底選擇其實唔少，鍾意食辣嘅我哋，揀咗麻辣湯底，麻香十足，辣度越食越辣，充滿層次。

平時喺倫敦唔少嘅火鍋餐廳，都會用機切，切得勁薄，口感同味道都欠奉。但潮牛潮汕牛肉火鍋嘅雪花牛肉，係廚師手切，雖然厚薄不一，但對比機切嘅當然係厚咗唔少，肥瘦分明，值得推介。

鍾意食肉味濃啲，口感豐富啲，推介潮牛潮汕牛肉火鍋嘅五花趾，筋肉分明，Q彈有嚼勁。

食麻辣湯底，當然唔少得索湯嘅食材，牛柏葉當然唔少得。

魷魚鬚份量十足，口感彈牙。

潮汕牛肉火鍋嘅寬麵人手即叫即拉，煙煙韌韌，同為索湯之選。

餐廳名稱：潮牛潮汕牛肉火鍋 NIU HOT POT
地址：Ground Floor, 43 Commercial St, London E1 6BD
營業時間：星期一至六 12:00 – 22:30、星期日 12:00 – 22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！