Foxhills Country Club – Golf Club & Resort：逃離倫敦的私密奢華Staycation，在隱世莊園有甚麼好玩？

英倫風嘅莊園大宅、一望無際嘅大草地、喺森林步道呼吸清新嘅空氣、極致嘅餐飲體驗、豐富嘅運動設施同娛樂活動，相信係唔少城市人嚮往嘅假期。其實由倫敦市中心出發，最快1個鐘就可以滿足以上嘅願望：Foxhills Country Club – Golf Club & Resort。度假村重視居住品質，所以由踏入呢個莊園，就可以享受遠離倫敦嘅煩囂，細緻嘅服務，令人好放鬆，咁究竟Foxhills Country Club – Golf Club & Resort呢個隱世莊園有啲咩好玩呢？

Foxhills Country Club – Golf Club & Resort：簡介

位於倫敦近郊嘅莊園大宅前身係一座維多利亞時代，走哥德復興風格嘅私人官邸。經過活化後，發展為依家嘅Foxhills Country Club – Golf Club & Resort。整個度假村佔地廣闊，被大片草地同森林包圍，保留咗濃厚嘅英倫鄉村氣息，同時又加入現代化設施，成為其中一間最近倫敦嘅鄉村俱樂部。除咗加入成為佢哋嘅會員之外，其實入往Foxhills Country Club – Golf Club & Resort亦可以享用俱樂部嘅設施，體驗私密、低調同奢華嘅度假空間。

Foxhills Country Club – Golf Club & Resort：房間

Foxhills Country Club – Golf Club & Resort只有大約66間客房，房型分為Executive Lyne House Room、Executive Courtyard Room、Junior Suite、Suite、Family Suite、Deluxe Suite等，密度低亦同時滿足不同類型的住客入住。

至於我哋今次入住嘅Executive Lyne House Room，由踏入房間就能感受到典雅英倫風，客房設計完美平衡了古典美學與現代舒適之間！房間強調舒適度同空間感，所以比一般倫敦酒店寬敞得多，更設有獨立客廳區；而且房內採光充足，大窗戶外望出去係一望無際嘅草原景色，景觀開揚又療癒，朝早自然光灑入嚟特別舒服，讓人即使留喺房間內都能徹底放鬆。

至於床鋪柔軟度適中，配套齊全；至於浴室亦設有浴缸與淋浴區，可以喺夜晚浸浴放鬆，一掃城市生活嘅疲憊，享受你想的度假節奏。

Foxhills Country Club – Golf Club & Resort：設施

作為一個綜合型度假村，Foxhills Country Club – Golf Club & Resort嘅設施當然非常全面！而講到度假，又點少得泳池呢？度假村設有多個室內外泳池，除咗游水，仲可以曬太陽，好chill咁享受莊園內嘅假期。

另外，Foxhills Country Club – Golf Club & Resort嘅運動設施非常豐富。擁有多個綠意盎然嘅標準哥爾夫球場、網球場、健身室之外，仲加入咗板式網球、匹克球等新興運動，令活動選擇更加多元化。

如果想親近大自然，Foxhills Country Club – Golf Club & Resort內亦設有森林步道，可以輕鬆散步或者晨跑，沿途空氣清新，非常療癒，完全沉浸於自然嘅美景之中。

如果喜歡靜態活動，Foxhills Country Club – Golf Club & Resort內嘅畫室同Spa，可能更適合你。度假村嘅Spa亦係佢哋嘅重點之一，提供桑拿、蒸氣房同多款水療服務，無論係按摩定facial都可以預約，適合想徹底放鬆身心嘅旅客。

如果是親子旅客的話，Foxhills Country Club – Golf Club & Resort亦設有適合小朋友玩嘅俱樂部，真係大小同小朋友都可以各自找到樂趣，享受屬於自己的放假模式。

Foxhills Country Club – Golf Club & Resort：餐廳

玩Staycation又點少得享受美食呢！Foxhills Country Club – Golf Club & Resort設有兩所餐廳，分別為走英式酒吧風格嘅Nineteen、新派印度菜Fine Dining嘅Lomri，分別提供輕食到正餐等不同選擇。無論係早餐、午餐定晚餐，都可以配合度假節奏自由安排，加上環境舒適，令整個用餐體驗更加分。

相關文章：Lomri – 在隱世莊園享受精緻又美味的印度式Fine Dining

入住一晚後，Foxhills Country Club – Golf Club & Resort嘅早餐同樣驚喜！酒店早餐採半自助形式，自助區有麵包、果汁、水果、芝士同火腿等選擇，但嚟到英國又點少得一份All Day Breakfast呢！酒店提供多款英式早餐選擇，除咗All Day Breakfast，仲有班戟、窩夫等選擇，絕對係一個Good Morning，亦為今次喺Foxhills Country Club – Golf Club & Resort嘅Staycation畫上完美嘅句號。

Foxhills Country Club – Golf Club & Resort：基本資料

酒店名稱：Foxhills Country Club – Golf Club & Resort
地址：Stonehill Rd, Ottershaw, Lyne, Chertsey KT16 0EL
預訂網址：www.foxhills.co.uk

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com