在唐人街遇上辣倫敦老錦里

喺外國人眼中嘅中菜，川菜一向都有崇高嘅地位，喺唐人街就可見一斑。而倫敦嘅唐人街都唔例外，川菜餐廳選擇非常多，今次就去咗老錦里，估唔到喺倫敦都食到非常正宗嘅川菜，麻香辣醇，直頭好似將四川搬咗過嚟一樣，惹味又回味呀！

老錦里

老錦里嘅大廚將啲五花肉片切得非常薄，醬汁帶有蒜香同醋香，入口即化，惹味又開胃。不過，作為一個越蒜越喜歡嘅人類，如果更多蒜嘅話，就更啱我口味喇！

老錦里嘅海蜇口感爽脆彈牙，配上香醋同麻油，味道同口感都充滿層次。

老錦里嘅川式小菜都有唔少選擇，而魚香茄子當然係送飯嘅最佳選擇。川式嘅魚香茄子同港式改良版嘅最大分別，當然係鹹魚香味無咁濃，而酸辣味更為突出。老錦里嘅魚香茄子酸甜微辣，茄子非常入味，絕對要叫多幾碗白飯呀！

水煮、口水同冒菜都係川菜常見嘅烹調方法，其中可以自由揀選配料嘅冒菜，就最啱我哋心水！老錦里嘅冒菜配料多達45款，肥腸、嫩牛肉、鴨血絕不能少！牛肉非常鮮嫩，夠晒入味；肥腸處理得非常乾淨，軟糯嘅口感真係肥腸先俾到你；鴨血嫩滑細膩，吸收晒麻辣嘅精華；毛肚脆爽彈牙，吸滿湯汁，同樣入味。

餐廳名稱：老錦里 Jinli
地址：4 Leicester St, London WC2H 7BL
營業時間：星期一至星期日 12:00-23:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！