倫敦煲仔飯Pot and Rice 我在英國好味煲仔飯

有啲咩港式食物令你念念不忘？近年嘅英國，因為移民潮，豐富咗香港美食嘅缺口，喺倫敦唔難搵到菠蘿包、車仔麵、燒臘飯、港式點心嘅縱影，就連煲仔飯亦不再遙不可及！Pot and Rice嘅倫敦煲仔飯絕不馬虎，提供10款唔同配料嘅選擇，加上Pot and Rice都有煲仔飯必須嘅飯焦同親切嘅廣東話，讓味覺同聽覺一秒返到香港！

Pot and Rice：港式鹵水拼盤

喺香港出街食飯，小食係必須嘅！Pot and Rice嘅港式鹵水拼盤，有雞蛋、雞翼、豆腐，全部都鹵得好入味，鹵水充滿層次！

Pot and Rice：混醬腸粉

如果Pot and Rice只保留一款小食，我希望係混醬腸粉！腸粉夠晒滑，加上醬香濃郁嘅甜醬同辣醬，又甜又辣絕對係完美結合，食唔停口。

Pot and Rice：蟹子鮮蝦腸粉

雖然有別於港人認識嘅鮮蝦腸粉，但蝦滑新鮮彈牙，腸粉同樣滑溜，味道充滿驚喜。

Pot and Rice：臘腸滑雞煲仔飯

臘腸同滑雞預先切粒，食嘅時候夠方便之餘，亦令飯底更容易吸收臘腸同滑雞嘅油香，所以一打開煲蓋，煲仔飯嘅香氣隨即湧出！另外，Pot and Rice嘅店主絕不吝嗇，因為臘腸同滑雞嘅份量超多，仲加咗一整隻冬菇，令呢個倫敦煲仔飯更有層次。

Pot and Rice：北菇滑雞煲仔飯

另一款倫敦煲仔飯就揀咗北菇滑雞煲仔飯，份量同樣十足，一整隻嘅冬菇，夠晒大粒，飯底充滿濃郁嘅菇香、雞肉嘅油香同煲仔飯嘅焦香，極具層次。而重點中嘅重點，當然係嗰塊脆卜卜嘅飯焦啦！

Pot and Rice：抹茶流心珍珠西多士

一份完美嘅晚餐，又點少得甜品呢！Pot and Rice嘅抹茶流心珍珠西多士嘅擺盤非常精美，絕對係相機食先。而香港人食甜品嘅評價，永遠都係唔會太甜取勝，所以Pot and Rice嘅西多士夾心取流心抹茶，減輕甜品嘅甜度，加上水果同珍珠，增加整體嘅口感，亦令甜品更精美。

Pot and Rice：基本資料

餐廳名稱：Pot and Rice
地址：16A D’Arblay St, London W1F 8EA
營業時間：星期一至四 11:30-22:00、星期五 11:30-22:30、星期六 12:00-22:30、星期日 12:00-22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com