免加一打邊爐放題 旺角至尊重慶雞煲

雞煲打邊爐絕對係成班朋友聚餐嘅熱門選擇！今次我哋就約埋幾個朋友嚟到位於旺角嘅至尊重慶雞煲，餐廳價錢相當實惠，任飲任食兩小時仲要免加一，所以成日都full booking！我哋特登提早預約，終於嚟到食至尊重慶雞煲嘅大日子，究竟係未真係咁抵食呢？

麻辣雞煲
至尊重慶雞煲嘅雞煲同出面餐廳好唔同，因為雞煲係入座先即刻煮，所以要等大概5-8分鐘，呢段時間可以攞醬汁同飲品，攞完之後，雞煲都差唔多上枱喇！由於雞煲係入座先即刻煮，所以雞肉唔會煮得太老，肉質仍然保持嫩滑多汁。我哋叫咗中辣，一開始覺得無咩感覺，但越煮越辣，非常惹味。另外，聽店員講，餐廳選擇即日運港嘅冰鮮雞，所以夠晒新鮮，份量每2位半隻，如果想無限encore，每位只需要加$10就得。

花膠、牛柏葉、魷魚
食到咁上下，就可以order花膠、牛柏葉、魷魚、鵝腸、豬皮等索汁嘅食材，記住係加湯之前放入鍋，等佢哋索晒啲辣汁，辣得好過癮！

打邊爐
之後就可以加入湯底，開始打邊爐喇！餐廳嘅食材選擇超多，份量亦會根據人數份量安排，唔會太多食唔晒，而根據今次嘅落單體驗，就無出現漏單嘅情況。至於大家最關心嘅肥牛嚟自美國，脂肪雖少但肉味濃，食得多都唔怕膩；至於豚肉片就略嫌棄肥咗少少；作為女仕嘅我就欣賞呢度嘅蔬菜類選擇非常多！

另外，仲有丸腸類、自家製水餃、滑雞肉、響鈴、烏冬、韓式公仔麵等超過30款食材！真係非常豐富。

飲品及甜品
飲品選擇唔少，基本嘅可樂、七喜、檸檬茶同無糖茶都有，更大驚喜當然係啤酒任飲啦！唔好以為只係得罐裝啤酒，連Asahi生啤都有，同班朋友，飲番幾杯都足以回本。
（飲酒要適量 、切勿酒後駕駛、酒精類飲品只可售賣予18歲以上人士）甜品就有雪糕杯、雪米糍、雪條，全部都係任食架！

至尊重慶雞煲 Supreme Restaurant
地址：旺角彌敦道593-601號創興廣場16樓
電話：+852 2148 2628
營業時間：星期一至日 12:00 – 23:45

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com