港版京都嵐山北港屋場竹林

想喺香港都有日本Feel？唔駛上樂天，唔駛去DONKI嘅，其實香港都有唔少地方賞楓賞櫻嘅！但如果你對京都嵐山嘅竹林有興趣，可以嚟到西貢嘅北港屋場竹林。

前往方法
1. 由彩虹或坑口坐往西貢市中心嘅專線小巴或巴士，喺北港站落車，行10分鐘到達起步點：北港花園
2. 我哋就選擇自駕遊，車可以泊喺北港花園村外免費停車場，不過車位唔多，先到先得

提提你
1. 由北港花園出發，路程約20分鐘，一開始條大斜路上山會辛苦少少，之後嘅上落波幅唔大，適合初級行山人士，但都要量力以為。沿路無洗手間同士多補給站，大家記住自備所需用品
2. 大家記住保持環境清潔，自己垃圾自己帶走，絕對唔可以破壞大自然環境

北港古道及茅坪古道
喺好耐好耐以前，如果想由馬鞍山去西貢，只係得一個方法，就係行山。以前嘅村民就靠現稱北港古道同茅坪古道往返兩地，依家兩條古道就成為大家嘅行山熱點，路線全長6.8公里，沿路景點主要有荒廢村屋遺蹟、五聯達學校遺址、屋場竹林同茅坪藤王。

屋場竹林
不過，如果你同我哋一樣，只係為咗打卡，影吓靚相嘅，就唔使行足全程，好似我哋咁選擇呢個比較簡單嘅方法，由北港花園出發，行大約20分鐘就會到達有竹林隧道之稱嘅屋場竹林。

行咗大概17分鐘，就會見到第一個竹林，呢度嘅竹樹集中喺左邊，構圖未算最靚，記住繼續行前。

大概3分鐘，兩旁嘅竹林，好似波浪咁遮蓋古道，形成隧道嘅感覺。竹樹一層一層壓至彎曲，而且非常翠綠，呢個就係大自然嘅美學。

如果時間許可，當然可以繼續往馬鞍山前行，如果唔係就好似我哋咁沿路往返。

北港屋場竹林
地址：西貢北港路

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com