當風箏遇上風 清水灣大坳門

以前學校嘅秋季旅行，唔知你有無去過大坳門呢？仲記得以前男同學會展示透爐嘅魅力，女同學就會展示燒嘢食嘅功力，孕育咗唔少青春Puppy Love。趁近期天氣怡人，我同A姐就去到大坳門，呢到除咗可以野餐、燒嘢食、放風箏，仲可以做一樣夜晚先做到嘅嘢，係咩？

前往方法
1. 喺鑽石山港鐵站乘搭巴士91、91R或91S至大坳門巴士站落車，步行約30分鐘到大坳門風箏場
2. 我哋就選擇自駕遊，車可以泊喺清水灣郊野公園外免費停車場，不過車位唔多，先到先得

提提你
1. 大家記住愛護大自然，保持環境清潔

清水灣郊遊公園
我哋叫慣叫熟嘅大坳門，其實正確嚟講，呢度應該叫大坑墩，係清水灣郊野公園範圍，郊野公園喺香港嘅東邊，係其中一個睇日出嘅最佳位置。

燒烤野餐區
喺郊野公園，當然唔少得燒烤爐同野餐枱啦，呢度就係充滿童年回憶嘅地方喇！

山頂觀景台
喺山頂嘅位置，可以一覽無遺睇到香港東南海面水域，包括果洲群島、青洲、東龍島、橫瀾島同及螺洲等地。

放風箏地點
大坳門最出名一定就係放風箏啦，仲有唔少人話呢度係全香港最開揚、風景最靚嘅風箏場添。如果你哋無風箏，可以喺郊野公園內嘅小賣部買。喺呢個放風箏地點，見到一隻又一隻起飛嘅風箏，充滿住驚喜同快樂；另一方面，亦見到好多未能成功起飛嘅風箏，充滿住毅力同堅持。原來放風箏都充滿好多人生道理㗎！

觀星賞月
詳情：香港觀星熱點 西貢大坳門
除咗放風箏，呢度因為遠離市區嘅光污染，所以亦係一個觀星賞月嘅熱點，特別係萬里無雲嘅夏天，仲有機會影到銀河添！我哋今日雖然係冬天，亦無咩特別攝影器材，所以我哋只影到少少星星，但現場睇嘅星星確實比張相多㗎。

大坳門 Tai Au Mun

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com