蓮香居：懷舊茶樓情懷，估唔到搵到呢個失傳點心

講起香港嘅飲茶文化，當然係一盅兩件啦：一壺滾水沖泡嘅靚茶，配上一籠籠熱辣辣嘅點心，睇吓報紙或邊食邊傾，簡單卻又充滿人情味。估唔到呢份屬於昔日酒樓嘅懷舊，今日喺蓮香居仲能感受到嗰種氣氛。蓮香居店內裝潢重現懷舊酒樓情懷，喺復古嘅設計下，估唔到仲搵到呢個接近失傳嘅點心，相信食嘅唔只係味道，更係一份屬於老香港嘅集體回憶。

蓮香居：花膠魚翅灈湯餃

灌湯餃真係唔係間間酒樓都有得食，而且唔少酒樓為咗減低成本，灌湯餃餡料都唔係太講究，蟹柳都成為餡料上客。不過，蓮香居嘅灌湯餃竟然搵到花膠同魚翅，兩者一樣索晒豬肉、蝦同埋香菇嘅湯汁，鮮甜就係佢嘅精華所在。

蓮香居：筍尖蝦餃

蝦餃皮晶瑩剔透，隱約咁望到內裡嘅餡料就證明到佢有幾薄。包住嘅係爽口彈牙嘅蝦肉，加上清爽嘅筍尖，口感豐富。

蓮香居：陳皮牛肉球

牛肉球喺唔少酒樓只係小點，但其實以前嘅牛肉球，因為加入陳皮，位置同地位都比而家嘅高。蓮香居嘅陳皮牛肉球都唔例外，肉味濃厚，軟腍之中夾雜住馬蹄嘅爽脆口，帶有陣陣嘅陳皮香味，充滿層次。

蓮香居：鮮豬肚燒賣

近年大家關注健康，所以豬肚燒賣真係買少見少，成為其中一個失傳點心。喺蓮香居就搵到鮮豬肚燒賣，豬肚大大嚿，爽彈嘅口感加上半肥瘦嘅豬肉，令燒賣爆晒肉汁，，抵食美味兼備！

蓮香居：咖喱蒸土魷

土魷選料厚身，入口爽彈有咬口，最正係魷魚本身容易掛汁，每一啖都吸滿濃郁咖喱汁。咀嚼之間咖喱香氣慢慢滲出，鹹香惹味，食落特別滋味。

蓮香居：豉汁蒸鳳爪

鳳爪蒸得軟腍入味，輕輕一啜就可以骨肉分離，雞皮入口滑溜，肉質亦吸收晒豉汁嘅鹹香。滿滿膠質感嘅肉汁隨住每一啖滲出，係飲茶時令人忍唔住一食再食嘅經典點心。

蓮香居：雞油馬拉糕

一向食馬拉糕都係食佢鬆軟香甜嘅口感，估唔到蓮香居用雞油製作，令馬拉糕嘅質感更鬆軟！切開金黃色嘅糕身，可以見到一層層似風琴咁細密嘅內層，入口鬆軟綿密，仲帶住一陣獨特嘅油香，比一般馬拉糕多一份濃郁滋味。

蓮香居：基本資料

餐廳名稱：蓮香居
地址：旺角西洋菜南街218-220號生發大廈3樓

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com