元朗平靚正日式盛宴 野川拉麵の深燒食堂
元朗出名多嘢食，除咗地道嘅大排檔同港式小食，仲有唔少高質小店！鍾意食日本嘢嘅我哋就嚟到元朗一間區內名店，主打日式本菜嘅野川拉麵の深燒食堂。野川拉麵の深燒食堂選材新鮮，多款新鮮刺身、壽司、串燒、壽喜燒等，食材處理細緻，味道同價錢都好有驚喜，非常滿足。
六品刺身盛合
一份刺身盛合有齊三文魚、油甘魚、帶子、甘蝦、北寄貝，新鮮鮮甜之外，每款都有3件，份量十足！至於盛合陣容仲有半板海膽，鮮甜回甘，性價比超高！
活赤貝刺身
活赤貝絕對係今日之最！活赤貝非常新鮮，口感厚實彈牙，點上豉油同芥末，令活赤背嘅鮮甜味更為突出，真係想瘋狂encore！
壽司
食完刺身盛合，仲想encore，一於叫多幾件壽司啦！厚切嘅油甘魚壽司，帶有啖啖嘅油脂香同魚生嘅鮮甜味；北寄貝壽司嘅甜味比油甘魚更勝一籌，至於厚薄度啱啱好，更突顯北寄貝嘅彈牙口感；鮮帶子壽司就係三款壽司入面，海水味最濃嘅一款，獨特嘅帶子口感，成為我的最愛。
牛油蒜蓉焗蜆+鮑魚一隻
當蜆肉加上香濃嘅牛油同微辛嘅蒜茸調味之後，蜆肉嘅鮮甜更進一步地昇華！但更精彩嘅當然係配菜嘅金菇啦，吸引晒海水味、牛油味同埋蒜香味，真係無得輸。另外，加多隻燒鮑魚，最鍾意鮑魚裙邊嘅焦香同彈牙嘅口感，再加上牛油蒜蓉嘅魔鬼味道，絕對係最完美嘅配搭。
牛肉壽喜燒
壽喜燒嘅靈魂就係要做出鹹甜均衡嘅湯底，野川拉麵の深燒食堂嘅壽喜燒湯底就啱啱好！配菜嘅冬菇同白菜完美地吸收晒壽喜燒嘅湯汁，非常甘甜；常見嘅粉絲就換上蒟蒻絲，口感嫩滑彈牙，而且更健康；重點當然唔少得肥瘦適中嘅牛肉啦！牛肉嘅油脂混合埋壽喜燒湯汁，更加惹味。
野川拉麵の深燒食堂
地址：元朗又新街40-48號榮豐大廈地下B號舖
電話：+852 3705 9833
營業時間：星期一至日 11:00 – 01:30
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
