抵食高質龍蝦盛宴 尖沙咀The Point – Pizza & Pasta
因為疫情嘅關係，呢排都食多咗外賣。不過講真我哋都係比較鍾意堂食，新鮮熱辣永遠係最好味。趁呢排疫情有啲好轉，我哋都多咗出街食飯。今日就去咗尖沙咀The ONE商場嘅The Point – Pizza & Pasta，試咗佢嗰期間限定「龍蝦盛宴 Lobster Feast」套餐。
「龍蝦盛宴 Lobster Feast」套餐有2碗龍蝦湯、龍蝦芝士焗通粉、招牌原隻龍蝦薄餅同2x菠蘿梳打特飲，龍蝦迷一定唔可以錯過！
龍蝦湯 Lobster Bisque
首先，一人一個龍蝦湯。一嚟到就聞到陣陣龍蝦鮮味，嗰湯入口都幾厚身，最正係裏面仲有幾多龍蝦肉，真材實料，一啲都唔馬虎。
龍蝦芝士焗通粉 Lobster Mac
中間嘅龍蝦鉗真係好吸睛，大大隻，厚肉鮮甜。除咗嗰龍蝦鉗之外，嗰意粉都有好多龍蝦肉。通心粉煮得啱啱好，煙靭得來又唔會太硬，每粒都掛住濃郁嘅龍蝦汁，仲有一絲絲嘅芝士，冇得彈！
招牌原隻龍蝦薄餅 Lobster Pizza
嘩！嗰Pizza有原隻龍蝦再加埋火焰，賣相非常吸引。唔好以為淨係得個樣，聽經理講餐廳採用最幼滑嘅意大利00麵粉製作Pizza嘅麵糰，發酵超過24小時，再放入特製嘅火爐焗，所以嗰Pizza底特別煙韌香濃。上面鋪滿拆咗肉嘅龍蝦肉、茴香頭、車厘茄、水牛芝士同香茅龍蝦汁，食落唔會太Heavy，有淡淡嘅香茅味道中和返。中間嘅龍蝦拆咗肉之後唔好以為佢只係裝飾品，原來裏面釀滿鮮蝦、冬菇同車厘茄，再加埋龍蝦汁去焗，好惹味！
菠蘿梳打特飲 Pineapple Soda
龍蝦盛宴套餐仲包兩杯菠蘿梳打特飲，特別鍾意佢唔會太甜，啱晒食Pizza同意粉！
香蒜辣椒白酒煮大蜆 White Wine Clams
除咗個套餐之外，我哋仲叫咗香蒜辣椒白酒煮大蜆，大蜆一啲沙都冇，仲非常大隻，粒粒都好厚肉。配埋個香蒜白酒汁，真係好鮮甜，仲有少少辣味，正！
香煎鰽魚配薄荷香草忌廉汁 Pan Fried Barramundi
呢嗰香煎鰽魚分量十足，魚肉嫩滑鮮甜，配埋清新嘅薄荷香草忌廉汁，突顯鰽魚嘅鮮味！再連埋下面嘅薯蓉一齊食，出奇咁夾！值得一提嘅係佢嘅魚皮，輕輕燒過，入口煙靭，口感豐富。
Mock Champagne + Pomegranate and Lemon Ice Teas
Mock Champagne成杯香檳咁，其實係蘋果汁同青檸汁加薑味汽水，好Refreshing。另外一杯就係紅石榴檸檬冰茶，唔係好甜，好解渴！
朱古力布朗尼餅 Brownie in a Pan
最後，食埋甜品，熱辣辣嘅朱古力Brownie配冰凍嘅雲呢拿雪糕，一凍一熱，冷靜與熱情之間！再加埋旁邊嘅烤香蕉合桃，好滿足！
The Point – Pizza & Pasta
地址：尖沙咀彌敦道100號The ONE 4樓409號舖
營業時間：星期一至四 12:00 – 21:00；星期五至日、公眾假期及公眾假期前夕 12:00 – 22:00
電話：+852 2598 0030
其他分店：
將軍澳
地址：唐德街9號將軍澳中心地下G01及G02號舖
營業時間：星期一至三 11:30 – 21:00；星期四至日及公眾假期前夕 11:30 – 22:00；公眾假期 11:00 – 22:00
電話：+852 2799 8801
荃灣
地址：大河道98號如心廣場商場二期2樓214號舖
營業時間：星期一至四 11:30 – 21:00；星期五至日、公眾假期及公眾假期前夕 11:30 – 22:00
電話：+852 2947 3866
青衣
地址：青敬路33號青衣城地下G01號舖
營業時間：星期一至四、星期日11:30 – 21:00；星期五至六、公眾假期及公眾假期前夕 11:30 – 22:00
電話：+852 2180 6162
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
