金城小廚：記憶和味道仍是昔日的冬菇亭

作為大圍嘅前街坊，心中或多或少都有幾間念念不忘嘅好食推介。記得細個嘅時候，金城小廚仲喺係顯徑邨冬菇亭經營，作為接近30年嘅老字號原來已經搬遷，座位比以前舒服咗，但味道同人情味依舊，而燒味仍然每日新鮮自家製作，原來記憶和味道仍能重拾昔日嘅情懷。

金城小廚

金城小廚搬嚟新舖後，其實餐牌都更新咗唔少，連膝頭哥都有得食！其實雞膝頭即係雞腳關節嘅軟骨，配上簡單嘅豉油、日式芥末醬就已經非常惹味，而口感Q彈又有嚼勁，冷盤嘅食法不失為一道開胃菜！

平時食雞中翼，但係又唔想啃骨，呢道反轉雞中翼就啱晒啦！所謂反轉就係將雞中翼外皮炸到金黃脆口，然後金城小廚大廚將雞翼嘅肉全數反至同一方向，咁就可以好似雞鎚咁啖啖肉啦！濃稠嘅蜜汁甜鹹嘅比例拿捏得非常平均，而且雞肉肉質保持鮮嫩多汁。

古法焗魚腸呢啲懷舊經典粵菜真係買少見少，喺金城小廚見到梗係要嗌嚟試吓啦！充滿住魚油甘香嘅魚腸加上冬菇絲、芫荽、陳皮絲等配料加到蛋液當中，再用上懷舊砵仔蒸煮，每一啖都充滿住淡淡嘅陳皮香以及不同食材嘅口感。

呢度餸菜最重要當然係海蝦要新鮮啦！而新鮮嘅海蝦當然係爽口彈牙，蝦肉完全唔痴殼！加上生熟蒜、粉絲簡單調味就形成呢一度食到舔舔脷嘅金城小廚名物啦！

餐廳名稱：金城小廚 Golden City Kitchen
地址：大圍積運街2-8號海福花園商場地下33號舖

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！