Cow Cow Korean BBQ Buffet：倫敦最強放題！食勻韓燒、火鍋、韓式小菜，竟然仲有呢樣？

食放題就梗係要盡興啦！位於倫敦東部嘅 Cow Cow Korean BBQ Buffet除咗任食火鍋同任食韓燒之外，更不介意提升成本，仲有人氣嘅韓式小菜同湯品，就連壽司同刺身都係無限制任食，款式近百款但價錢夠貼地，提前預訂仲有額外優惠，堪稱倫敦最強放題！

Cow Cow Korean BBQ Buffet：自助吧枱

Cow Cow Korean BBQ Buffet每枱都有一部ipad作電子落單，值得一讚嘅係，完全唔會漏單，全部都上齊！而喺等上菜嘅期間，可以先去自助吧枱攞醬料，自取區域仲有中華沙律、韓式泡菜，仲有我哋推介必食嘅葡撻，酥皮外層非常鬆脆，蛋香嫩滑仲帶有焦糖味，非常驚喜。

Cow Cow Korean BBQ Buffet：韓燒

韓燒可以話係餐廳嘅主打，所以選擇都幾多，牛肉類嘅選擇有牛舌、西冷、牛肋肉等，但最深得我心嘅當然係牛仔骨啦！牛仔骨預先醃製，所以非常入味，肉質軟腍，想食辣嘅，仲可以另加辣粉，更添惹味。除咗牛肉之外，仲有雞肉同海鮮等，其中原隻魷魚可以話係回本必食，魷魚大大隻，口感彈牙，加少少鹽調味，就已經非常滋味！

Cow Cow Korean BBQ Buffet：火鍋

相對韓燒，Cow Cow Korean BBQ Buffet嘅火鍋嘅選擇可能少啲，但打邊爐必備嘅牛肉、羊肉都有；物以罕為貴，喺英國相對屬於貴價嘅皇帝菜、金菇，竟然一大盤端上，真係完全唔孤寒，擺落濃郁嘅湯底，索晒湯汁，非常惹味。

Cow Cow Korean BBQ Buffet：韓式小菜及湯品

炸雞、韓式炒粉絲、餃子、韓式拌飯、辣炒年糕等小菜主食外，仲有韓國菜必備嘅泡菜湯，選擇應有盡有。

Cow Cow Korean BBQ Buffet：壽司及刺身

喺倫敦唔少標榜放題嘅餐廳，其實刺身係每人限量，但喺Cow Cow Korean BBQ Buffet就唔使就住就住，因為係無限量任嗌，而且刺身仲有三文魚同吞拿魚兩款，刺身厚切，三文魚肥味，絕對能夠滿足口感。至於壽司方面，除咗外國常見嘅卷物之外，握壽司嘅選擇都唔少，推介嘅有鰻魚壽司同赤蝦壽司，估唔到赤蝦都幾大隻，仲有蝦膠嘅質感；連我本人私心最愛嘅腐皮壽司都有，千祈唔好話我嘥quota！

Cow Cow Korean BBQ Buffet：基本資料

餐廳名稱：牛牛韓式燒烤 Cow Cow Korean BBQ Buffet
地址：47-49 Lee High Rd, London SE13 5NS

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com