GAMA：倫敦New Malden全新韓國餐廳，竟然有呢樣少見的韓國美食

August 19, 2026 aandmdiary

喺倫敦想食韓國菜、行韓國超市掃貨，感受一下喺英國難得嘅韓國氛圍，就一定要去有「小韓國」之稱嘅New Malden啦！GAMA係近期New Malden全新登場嘅韓國餐廳，平日嘅晚餐時段已經座無虛席，唔少食客更加係旅居英國嘅韓國人，全因為GAMA除咗燒肉、炸雞、泡菜湯之外，仲有呢樣少見嘅韓國美食呢！

GAMA

GAMA：Korean Honey Butter Chicken

GAMA嘅炸雞選擇有三款口味，我哋就揀咗以甜味為主嘅Korean Honey Butter Chicken。炸雞外層炸得香脆，掛上蜜糖牛油醬汁後，入口帶住香甜嘅蜜糖味，同時有牛油嘅濃郁香氣，甜甜鹹鹹嘅味道幾開胃。但最估唔到係叫細份，都有成10隻雞翼，份量十足！

GAMA, Korea BBQ, London, New Malden, 倫敦, 倫敦美食, 推介, 推薦, 泡菜湯, 炸雞, 燒肉, 美食, 英國, 英國美食, 評論, 韓國燒烤, 韓國燒肉店, 韓國菜, 韓燒, 韓牛, 食乜好, 食評, 餐廳 — Korean Honey Butter Chicken

GAMA：Seafood Jjampong Soup

去食韓國菜，枱面又點少得一碗湯呢！除咗泡菜湯，想鮮甜啲，可以叫海鮮湯！GAMA嘅Seafood Jjampong Soup以香辣湯底配上大量嘅鮮蝦、青口等海鮮令成碗湯更加鮮甜，入口帶住微微辣香，湯味濃郁非常開胃。

GAMA：Sotbap Meal – Pork Bulgogi

GAMA將英國少見嘅傳統韓食有帶嚟！Sotbap以熱辣辣嘅石鍋盛載白飯，雖然同石鍋飯類似，但飯內只有南瓜作調味，單調原來唔簡單。清新嘅南瓜，更能突出白飯嘅甜味，如果嫌佢味道太清，重口味嘅你可以加上韓式辣炒豬肉，微辣又惹味！店員最後仲會喺石鍋加入水，將石鍋內嘅飯焦起出，清淡又不失口感，更能仔細感受韓國人對飯的重視。

GAMA：Table Skewers

平時食韓燒嘅話，邊燒又要邊同朋友傾偈，一唔為意真係燒燶晒！所以GAMA特登引入自助轉轉烤爐，除咗方便一班朋友傾偈之外，食物嘅生熟程度亦都相對平均，非常方便。Beef Rib Finger肉質較為嫩滑，燒香之後鎖住肉汁，加上餐廳已預先調味，味道濃郁，非常滋味；至於多春魚喺英國真係少見，見到真係必叫！多春魚燒到微燶，非常香脆，建議加上枱面三種唔同程度嘅辣粉，就更為香口！