港味道：估唔到喺威爾斯都搵到超地道港式茶餐廳
放假去威爾斯玩兩日一夜，呢間餐廳竟然值得我哋幫襯兩次？港味道（Taste of Hong Kong）位於威爾斯嘅史雲斯（Swansea）。餐廳顧名思義主打港式茶餐廳，經典嘅西多士、焗豬扒飯都有，而且價錢仲要非常貼地，更加係旅居5年嚟，令我哋最驚喜嘅港式茶餐廳！而最深得我哋心嘅係就係呢樣嘢……
港味道
港味道：花生醬西多士
花生醬西多士即叫即炸，炸到金黃色，賣相一流！上層嘅牛油同糖漿，中間厚厚嘅花生醬，多重嘅味道層次，成為西多士嘅靈魂。加上脆卜卜嘅口感，真係非常邪惡，但就係呢種罪惡感，成為港味道嘅名物。
港味道：菠蘿包
估唔到仲有自家製嘅菠蘿包呢！港味道嘅菠蘿包每日新鮮出爐，麵包非常鬆軟，金黃酥脆嘅表皮，一咬即碎！呢種外脆內軟嘅口感，真係港式茶餐廳嘅靈魂。想體驗冰火交融嘅刺激，仲可以選擇菠蘿油，重拾港式冰室的經典。
港味道：鮮茄焗豬扒飯
同樣係即叫即焗，所以要有耐性哦！鮮茄焗豬扒飯上枱熱辣辣，表面嘅芝士經過烘焗而微燶，焦香味加上拉絲，只係鮮茄焗豬扒飯嘅基本。重點係鮮茄嘅醬汁，酸酸甜甜非常惹味，神還原港式嘅味道，雖然豬扒略嫌鹹咗少少，但勝在份量十足，非常抵食。
港味道：叉燒湯意粉
作為香港人，常餐就梗係叉燒湯意粉啦！港味道嘅常餐同樣抵食，一碗湯意，加上炒蛋、多士同熱飲，就係最佳組合。意粉用上忌廉湯底，味道非常濃郁，所以夠晒惹味又掛湯；至於叉燒嘅份量同樣驚人，望上去以為偏瘦，但口感竟然非常軟腍，而且叉燒非常入味，非常好味！
港味道：自家製五香肉丁米、沙嗲牛肉麵
早餐係週末限定，有齊湯麵、炒蛋、多士同熱飲，非常抵食，想食就要較定鬧鐘去幫襯喇！除咗最抵食嘅火腿通粉早餐之外，茶餐廳又點少得港式麵檔嘅兩大靈魂：沙嗲牛肉同五香肉丁呢！五香肉丁因為英國入口限制，所以真係非常少見，嚟到港味道見到自家製，當然係必嗌啦！五香肉丁調味恰到好處，味道香辣惹味，而肉質又唔會死實，充滿誠意；至於沙嗲牛肉麵嘅味道非常濃郁，牛肉軟滑，同樣驚喜。
港味道：凍檸茶、凍奶茶
一間成功嘅茶餐廳，最重要係杯茶！港味道嘅檸茶同奶茶嘅茶底源自斯里蘭卡，空運直送，加上佢哋嘅配方，令茶味非常香濃，入口絲滑順喉，帶有濃郁嘅茶香回甘，成為深得我哋心嘅推介！
港味道：基本資料
餐廳名稱：港味道 Taste of Hong Kong
地址：23 Nelson St, Swansea SA1 3QE
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
