墨爾本大味火鍋：四川茶館主題的火鍋店

講起四川嘅傳統文化，相信都會諗起川劇，而傳統嘅川劇會喺茶館進行，等大家邊嘆茶邊欣賞精彩嘅表演。位於墨爾本嘅大味火鍋，餐廳設計就神還原四川茶館，就連火鍋嘅配料都用上茶杯，極具心思；加上香濃嘅麻辣湯底，估唔到喺墨爾本都有咁高質嘅火鍋店。

大味火鍋：十二生肖雙人套餐

我哋今次叫嘅大味火鍋套餐，可以喺指定食材入面選擇十二款配料，就連鴨血、滑牛、黃喉等都有，絕不馬虎，而且份量原來都唔少，非常飽肚。

大味火鍋：湯底

大味火鍋套餐可以揀兩款湯底，選擇包括：麻辣安格斯牛油鍋、大骨濃湯、港式金湯、菇菌湯等。其中麻辣安格斯牛油鍋，香氣濃郁，醇厚嘅牛油加上花椒的麻香，充滿層次；另一款揀咗大骨濃湯，湯底呈奶白色，非常香濃，啱晒同麻辣湯作一辣一唔辣嘅配塔。

大味火鍋：配料推薦

嫩滑鮮牛肉：輕輕一淥就食得，肉質非常嫩滑，厚薄適中，口感一流；
麻辣滑牛肉：麻辣牛肉係嫩滑鮮牛肉嘅進化版，每片滑牛都索晒麻辣嘅味道，非常入味，香辣過癮；
鴨血：食大味火鍋又點可以無鴨血呢！鴨血新鮮滑嫩，越煮越入味，索晒湯汁真係無得輸；
燒椒皮蛋豬肉丸：嘩，超好味呀！平時港式邊爐有唔少手工肉丸，嚟到墨爾本嘅大味火鍋估唔到都有。今次嘅豬肉丸配上青椒同皮蛋，青椒增加肉丸嘅口感，而皮蛋令肉丸嘅味道層次提升，至於豬肉嫩滑多汁，真係大味火鍋驚喜必點之選；
牛百葉：口感脆爽，同樣係索湯之選，越煮越入味。

大味火鍋：冰鎮酸梅湯 + 爆漿糍粑

大味火鍋套餐仲包埋清爽解辣嘅冰鎮酸梅湯，唔會太酸，非常醒胃；甜品就由爆漿糍粑負責，即叫即炸，外酥內糯，入面充滿幸福感嘅黑糖，甜而不膩。

大味火鍋：特飲

大味火鍋仲有唔少特飲選擇，充滿熱帶風情嘅熱帶狂熱，酸酸甜甜，非常解喝；泰褲啦奶茶奶香十足，充滿泰式味道。

大味火鍋：基本資料

餐廳名稱：大味火鍋 David’s Hotpot
餐廳地址：279 La Trobe St, Melbourne VIC 3000

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com